საზოგადოება

ზვიად გამსახურდიას სიკვდილის მიზეზების გამოძიების მოთხოვნით მიმდინარე აქცია დასრულდა

პარლამენტის შენობის წინ ზვიად გამსახურდიას სიკვდილის მიზეზების გამოძიების მოთხოვნით მიმდინარე აქცია დასრულებულია.

აქციაზე საქართველოს პირველი პრეზიდენტის ოჯახის წევრებმა და მისმა მხარდამჭერებმა ზვიად გამსახურდიას გარდაცვალების გარემოებების გამოძიების მიზნით, პეტიციაზე ხელმოწერების შეგროვება დაიწყეს.

ზვიად გამსახურდიას შვილის ცოტნე გამსახურდიას განცხადებით, ივანიშვილის რეჟიმის პირობებში მათ არავითარი იმედია არ აქვთ, რომ ამ საქმეზე ჭეშმარიტება დადგინდება, შესაბამისად, ოჯახი უახლოეს პერიოდში აპირებს ევროსასამართლოს განცხადებით მიმართოს.

ცოტნე გამსახურდიას თქმით, კარგად ჩანს პროკურატურის სრული უმოქმედობა, სრული უნებისყოფობა ამ საქმეში. როგორც ის ამბობს საგამოძიებო ორგანო იჯერებს იმას, რასაც მოწმეები ყვებიან და მათ არ გააჩნიათ ნება ამ საქმეზე დადგეს ჭეშმარიტება.

შეგახსენებთ, რომ დღეს საქართველოს პირველ პრეზიდენტს ზვიად გამსახურდიას 79 წელი შეუსრულდებოდა.

აღნიშნულთან დაკავშირებით, ზუგდიდის მუნიციპალიტეტის სამთავრობო და საზოგადოებრივი წრეების წარმომადგენლებმა საქართველოს პირველი პრეზიდენტის მეცნიერ-ფილოლოგის, მწერლის, მთარგმნელის ბიუსტები, ზუგდიდში, დარჩელსა და ჯიხაშკარში გვირგვინებით შეამკეს და მის ხსოვნას პატივი მიაგეს.

დღესვე, სიმბოლურად, ზუგდიდის მუნიციპალიტეტის საკრებულოს სხდომათა დარბაზს ზვიად გამსახურდიას სახელი მიენიჭა.

ცირა გურგენიძე