სამართალი

შსს-ის მაღალჩინოსნის განცხადება უფრო მეტ კითხვას აჩენს, ვიდრე გუშინ იყო - საიამ პროკურატურას მიმართა

ახალგაზრდა იურისტთა ასოციაციამ პროკურატურას მიმართა თხოვნით, ნუცუბიძის პლატოზე გარდაცვლილი პაატა პავლიაშვილის მეუღლისთვის დაზარალებულის უფლებამონაცვლის სტატუსის მინიჭების შესახებ, რათა საიას შემდგომში ჰქონდეს წვდომა საქმის მასალებზე.

არასამთავრობოს წარმომადგენლის, ლევან ვეფხვაძის განცხადებით, კითხვის ნიშნებს ბადებს შს მინისტრის მოადგილის, შალვა ხუციშვილის დღევანდელი განცხადება სამხრე კამერების ვიდეოჩანაწერის არსებობის შესახებ.

შეგახსენებთ, პროკურატურის მტკიცებით, პაატა პავლიაშვილის დაკავების ვიდეოკადრი არ არსებობს.

„პროკურატურამ გუშინ გაავრცელა განცხადება, რომ არ არსებობს ვიდეოკადრი, დღეს შსს-ის მაღალჩინოსანი ამბობს, რომ ყველა კადრი არსებობს და გადაცემულია პროკურატურაში. ამის გამო უფრო მეტი კითხვა ჩნდება, ვიდრე გუშინ იყო. შესაბამისად, საკითხი დგას, აქვს თუ არა პროკურატურას საერთოდ ეს კადრები და მაშინ რატომ აკეთებს შსს მსგავს განცხადებებს“, - თქვა ვეფხვაძემ.

როგორც ხუციშვილმა ჟურნალისტებს აუხსნა, ვიდეოკადრებზე ასახულია არა პავლიაშვილის დაკავების, არამედ ცუდად გახდომის მომენტი.

25 ოქტომბერს ნუცუბიძის პლატოზე დაკავების დროს 33 წლის მამაკაცი გარდაიცვალა. არასამთავრობო სექტორი იმ სამხრე კამერების გამოქვეყნებას ითხოვს, სადაც დაკავების მომენტია აღბეჭდილი.

ანა მებურიშვილი