საზოგადოება

2016 წელს მომართვიანობის რეკორდული მაჩვენებელი დაფიქსირდა - უჩა ნანუაშვილი

საქართველოს სახალხო დამცველმა უჩა ნანუაშვილმა 2016 წლის საქმიანობის ანგარიშის წარდგენის დროს განაცხადა, რომ გასულ წელს მომართვიანობის რეკორდული მაჩვენებელი, 8.827 განცხადება/საჩივარიაა დაფიქსირებული. ანგარიშიდან გამომდინარე, ამ დროისთვის 7 196 განცხადებაზე/საჩივარზე მუშაობა დასრულებულია.

ნანუაშვილის განცხადებით, ომბუდსმენის აპარატმა გასცა 77 რეკომენდაცია, სადაც 39 % შესრულდა, ხოლო 10 % ნაწილობრივ შესრულდა.

„ჩვენ მიერ გაცემული რეკომენდაციების რაოდენობა ბევრია, სულ 77-ია. რაც შეეხება შესრულებას, 39% იყო შესრულებული წლის ბოლოს, რეკომენდაციების 10% კი ნაწილობრივ შესრულდა. რეკომენდაციების საკმაოდ დიდი ნაწილია, სადაც გვქონდა შუალედური პასუხი და იყო დაპირება, რომ შესრულდებოდა. წელს რთულია რომელიმე კონკრეტული უწყების დასახელება, რომელიც ასრულებდა ან არ ასრულებდა რეკომენდაციებს, ყველაზე ბევრი, 18 რეკომენდაცია პროკურორატურის მიმართ გაიცა, საიდანაც 15 შესრულდა“, - აღნიშნა უჩა ნანუაშვილმა.

2016 წლის ანგარიშის თანახმად, გასულ წელს სახალხო დამცველის ცხელ ხაზზე 2 559 ზარია შემოსული, ასევე შედგა 337 ოქმი, რომელთაგან 167 შეტყობინება თავისუფლების აღკვეთის დაწესებულებებში სავარაუდო უფლებადარღვევას ეხებოდა.

ანა მებურიშვილი