საზოგადოება

61-ე სკოლის პირველკლასელი მოსწავლის მდგომარეობა დამაკმაყოფილებელია

აღმაშენებლის გამზირზე ბიზნესცენტრ „მოზაიკაში“ მომხდარი შემთხვევის შედეგად დაზინებული მოსწავლის მდგომარეობა დამაკმაყოფილებელია. 61-ე სკოლის პირველკლასელი ინგოროყვას კლინიკაშია გადაყვანილი.

ინგოროყვას კლინიკასთან ამ დროისთვის 61–ე სკოლის დირექტორი, პედაგოგები, ახლობლები, მშობლები და ბავშვები იმყოფებიან. სკოლის დირექტორის შორენა ღუდუშაურის განცხადებით, მათი სკოლის პირველკლასელ მოსწავლეს კლინიკაში გამოკვლევები უკვე ჩაუტარდა და სერიოზული დაზიანებები არ აღენიშნება. მისი თქმით, ბავშვს წარბი აქვს დაზიანებული და კლინიკაში მიყვანამდეც კონტაქტური იყო.

როგორც დირექტორისთვის არის ცნობილი, აღმაშენებლის გამზირზე, ბიზნესცენტრ „მოზაიკაში“ სკოლის სარვამარტო ღონისძიება უნდა ჩატარებულიყო. მოსწავლე ბებიასთან ერთად იმყოფებოდა, როდესაც მე–4 და მე–3 სართულის კიბის უჯრედში ჩავარდა. ბებიამ მისი შეკავება ვერ შეძლო.