საზოგადოება

ადმინისტრაციის წევრები დავარწმუნეთ, რომ სკოლების კატეგორიებად დაყოფა არაერთგვაროვანი ხარისხის განათლებას არ გამოიწვევს - ალექსანდრე ჯეჯელავა

განათლებისა და მეცნიერების მინისტრის, ალექსანდრე ჯეჯელავას განცხადებით, პრეზიდენტის ადმინისტრაციის წვერებს „ზოგადი განათლების კანონში“ შეტანილი ცვლილებების მიმართ კითხვები ჰქონდათ.

როგორც ჯეჯელავამ მედიას, პრეზიდენტის ადმინისტრაციის უფროსთან, პრეზიდენტის მრჩევლებთან გუშინ გამართული შეხვედრის შეფასებისას განაცხადა, მოახერხა ადმინისტრაციის წევრების დარწმუნება იმაში, რომ სკოლების კატეგორიებად დაყოფა არაერთგავაროვანი ხარისხის განათლებას არ გამოიწვევს.

„პრეზიდენტის ადმინისტრაციის წევრებს ჰქონდათ შეკითხვები. გვქონდა, ძალიან პროდუქტიული შეხვედრა, სადაც განვიხილეთ საკითხები, მათ შორის, საკანონმდებლო ცვლილებებზე. დეტალურად შევჩერდით სკოლების კატეგორიის საკითხებზე. გამოთქვეს წუხილი, მოსაზრება, რომ შეიძლება ამან მიგვიყვანოს არაერთგვაროვანი ხარისხის განათლებისკენ. ჩვენ დავარწმუნეთ, რომ ასე არ მოხდება“,-აღნიშნა მინისტრმა და განმარტა, რომ საუბარია სამი კატეგორიის სკოლის დაყოფაზე.

„პირველი ორი კატეგორია არის ზომით გაყოფილი - 200 მოსწავლეზე ნაკლები სადაც სწავლობს და 200 მოსწავლეზე მეტი სადაც სწავლობს. ძირითადი მიზეზი ამ გაყოფის არის დაფინანსების სქემა იმიტომ, რომ ჩვენი დღევანდელი დაფინანსება 200 მოსწავლემდე სკოლებს აკმაყოფილებს. 200 მოსწავლეზე ზემოთ სკოლებში კი არის დაფინანსების მხრივ მნიშვნელოვანი სირთულეები. ვაპირებთ ახალ სქემაში ეს ხარვეზი აღარ არსებობდეს. 200 ბავშვზე მცირე და მეტ სკოლებში პედაგოგების მიღებასთან, მათ პროფესიულ განვითარებასთან, საკვალიფიკაციო მოთხოვნებთან დაკავშირებით არის ასევე სირთულეები. მოგეხსენებათ, მცირე სკოლები არის სოფლებში, სადაც საკადრო ბაზარი შეზღუდულია. ჩვენ ვაპირებთ გავითვალისწინოთ ეს სპეციფიკა. მესამე კატეგორია ეს იქნება წამყვანი სკოლები, ეს იქნება კრიტერიუმებზე აგებული კატეგორია ანუ მცირე სკოლასაც და დიდ სკოლასაც შეუძლია გახდეს წამყვანი სკოლა თუ დააკმაყოფილებს კრიტერიუმს. კრიტერიუმები ჯერ არ გვაქვს ამ მიმართულებით, მაგრამ კომიტეტი შეიმუშავებს“, - აღნიშნა ალექსანდრე ჯეჯელავამ.

ზოგადი განათლების შესახებ კანონი პარლამენტმა 21 დეკემბერს 86 ხმით მესამე მოსმენით დაამტკიცა. პარლამენტმა ეს კანონპროექტი დაჩქარებული წესით განიხილა. კანონში ცვლილებები პარლამენტის განათლებისა და მეცნიერების კომიტეტმა მოამზადა.

მონიკა დავლიანიძე