კომენტარი

ადმინისტრაციული ხარჯების ოპტიმიზაციას ჩვენც ვაპირებთ - ირაკლი ხმალაძე

თუ ვინმეს გჯერათ, რომ 200 მლნ აქვს სარესტორნო ხარჯებში ჩადებული ბატონ დავით ნარმანიას, ძალიან ცდებით, - განუცხადა ჟურნალისტებს თბილისის ვიცე-მერმა ირაკლი ხმალაძემ და აღნიშნულით ხარჯების ოპტიმიზაციის საკითხზე საკრებულოს ოპოზიციური ფრაქცია "ევროპული საქართველო - თბილისის" თავმჯდომარის, გოკა გაბაშვილის შეთავაზებას გამოეხმაურა.

მისი თქმით, ადმინისტრაციული ხარჯების ოპტიმიზაციას მერია ისედაც გეგმავს.

„თუ ვინმეს გჯერათ, რომ 200 მლნ აქვს სარესტორნო ხარჯებში ჩადებული ბატონ დავით ნარმანიას, ძალიან ცდებით. ადმინისტრაციული ხარჯების ოპტიმიზაციას ჩვენც ვაპირებთ. მთავრობის დღევანდელ სხდომაზე გამოვაცხადეთ სტრუქტურული რეფორმა, რომელიც დაიწყება. თბილისის მუნიციპალიტეტში დაინერგება მმართველობის ეფექტიანი სისტემა და ამას მოხმარდება იმდენი რესურსი, რამდენიც საჭიროა",- აღნიშნა ხმალაძემ.

ამასთან, ვიცე-მერს არ დაუკონკრეტებია სტრუქტული რეფორმის დეტალები.

"ჩვენ მომდევნო 3 თვის განმავლობაში, კანონის თანახმად, უნდა დავასრულოთ ოპტიმიზაცია, სტრუქტურული რეფორმა. დროთა განმავლობაში გახდება ცნობილი, თუ როგორი ფუნქციური ცვლილებები იქნება შეტანილი მერიას დაქვემდებარებულ სტრუქტურებში. ვერაფერს დაგიდასტურებთ და ვერაფერს გამოვრიცხავ. ეს არის გრძელვადიანი პროცესი, რა დროსაც ჩვენ უნდა შევისწავლოთ, რა არის ოპტიმალური სტრუქტურა თბილისის მუნიციპალიტეტის და რა საკადრო რესურსი სჭირდება. არ გამოვრიცხავ და ველოდებით, მნიშვნელივან საკადრო ცვლილებებს",- განაცხადა ხმალაძემ.

ნინო ექვთიმიშვილი