პოლიტიკა
აფგან მუხთარლის დაზარალებულის სტატუსი უნდა მიენიჭოს - სახალხო დამცველი
სახალხო დამცველმა, უჩა ნანუაშვილმა მოითხოვა საქართველოს მთავარი პროკურატურისგან, რომ აზერბაიჯანელ ჟურნალისტ აფგან მუხთარლის მიენიჭოს დაზარალებულის სტატუსი.
„აფგან მუხთარლის მიენიჭოს დაზარალებულის სტატუსი, რათა მასა და მის ადვოკატს მეტი შესაძლებლობა ჰქონდეთ, დააკვირდნენ შსს-ის თანამშრომლების მხრიდან შესაძლო დანაშაულის ჩადენასთან დაკავშირებით მიმდინარე გამოძიებას“, - განაცხადა ნანუაშვილმა დღევანდელ პრესკონფერენციაზე.
ომბუდსმენმა ამჯერად წერილობით მიმართა პროკურატურას, რომ მუხთარლის საქმის გამოძიება სწორედ ამ უწყებამ აწარმოოს.
„სახალხო დამცველი მიიჩნევს, რომ აფგან მუხთარლის მიმართ საქართველოს შსს-ს თანამშრომლების მიერ ჩადენილი შესაძლო დანაშაულის ფაქტზე გამოძიების წარმოება იმავე სამინისტროს მიერ ვერ უზრუნველყოფს ეფექტიანი გამოძიებისთვის საჭირო დამოუკიდებლობის ხარისხს“, - განცხადა ნანუაშვილმა.
სახალხო დამცველმა ასევე ყურადღება გაამახვილა ყოფილი კოლმეურნეობის მოედანზე არსებულ იმ ვიდეოჩანაწერებზე, სადაც აფგან მუხთარლი იყო დაფიქსირებული. ნანუაშვილის თქმით, ეჭვს ბადებს, რომ დროის იმ მონაკვეთში, როდესაც სავარაუდოდ კადრში აფგან მუხთარლი უნდა გამოჩენილიყო, კადრი ჩერდება და განსხვავებული ჩანაწერით იცვლება.
სახალხო დამცველის თქმით, მისმა აპარატმა უკვე მიმართა პროკურატურას იმის დასადგენად, ხომ არ იყო ეს ვიდეოჩანაწერი გაყალბებული.
„აღნიშნულის თაობაზე სახალხო დამცველის აპარატმა უკვე მიმართა საქართველოს მთავარ პროკურატურას და გამოითხოვა ინფორმაცია, ხომ არ გაჩენილა ეჭვი ჩანაწერების ავთენტურობასთან დაკავშირებით და აღნიშნულის დასადგენად დაინიშნა თუ არა შესაბამისი ექსპერტიზა“, - განაცხადა ომბუდსმენმა.
ანა მებურიშვილი