მსოფლიო

ჟენევაში აშშ-ისა და ირანს შორის მოლაპარაკებები მიმდინარეობს

ჟენევაში აშშ-ისა და ირანს შორის მოლაპარაკებები მიმდინარეობს, - ინფორმაციას ირანის სახელმწიფო საინფორმაციო სააგენტო Tasnim-ი ავრცელებს.

გამოცემის ცნობით, აშშ-ისა და ირანის წარმომადგენლებს შორის ბირთვული შეთანხმების შესახებ მოლაპარაკებები არაპირდაპირ ფორმატში, ომანის საგარეო საქმეთა მინისტრის ბადრ ალ-ბუსაიდის შუამავლობით მიმდინარეობს.

მხარეებს შორის მოლაპარაკებები ომანის საელჩოში იმართება.

ირანის დელეგაციას ქვეყნის საგარეო საქმეთა მინისტრი აბას არაღჩი ხელმძღვანელობს, ხოლო ამერიკულ მხარეს აშშ-ის პრეზიდენტის წარმომადგენლები, სტივ უიტკოფი და ჯარედ კუშნერი წარმოადგენენ.

ცნობისთვის, აშშ-ისა და ირანის დელეგაციებს შორის მოლაპარაკებების წინა რაუნდი ომანის დედაქალაქ მასკატში 6 თებერვალს გაიმართა.

წარმოგიდგენთ ირანსა და აშშ-ს შორის არაპირდაპირი მოლაპარაკებების მთავარ სიახლეებს:

12:38 — არაღჩი ხვდება ომანის საგარეო საქმეთა მინისტრს
ირანსა და აშშ-ს შორის არაპირდაპირი მოლაპარაკებების დაწყებასთან დაკავშირებით ირანის საგარეო საქმეთა მინისტრი სეიედ აბას არაღჩი ხვდება ომანის საგარეო საქმეთა მინისტრ ბადრ ალ-ბუსაიდის.

12:28 — ირანული დელეგაცია მოლაპარაკებებზე გაემგზავრა
ირანის დელეგაცია გაემართა მოლაპარაკებებზე აშშ-სთან არაპირდაპირი მოლაპარაკებების ჩასატარებლად.

12:15 — ბაღაი: მოლაპარაკებები რამდენიმე წუთში დაიწყება
ირანის საგარეო საქმეთა სამინისტროს პრესსპიკერმა ესმაილ ბაღაიმ ჟენევაში ირანსა და აშშ-ს შორის არაპირდაპირ მოლაპარაკებებზე განაცხადა:
„დღეს გაიმართება მოლაპარაკებების მეორე რაუნდი. ის გუშინ დაიწყო საგარეო საქმეთა მინისტრის ომანელ კოლეგასთან საუბრის შემდეგ. მოლაპარაკებები დღეს შუადღისას დაიწყება და ორივე დელეგაცია ჯერ ომანურ მხარეს შეხვდება, რის შემდეგაც ომანის საგარეო საქმეთა მინისტრი განიხილავს შედეგებს. მოლაპარაკებების ერთადერთი თემა ბირთვული საკითხია“.

გუშინ არაღჩიმ სააგენტოს გენერალურ დირექტორთან მოლაპარაკებები გამართა. დღეს ამერიკული მხარე გროსისთან მართავს შეხვედრას.

დღეს შუადღეს არაღჩი ასევე მიიღებს მონაწილეობას განიარაღების კონფერენციასთან დაკავშირებულ საერთაშორისო შეხვედრაში.