საზოგადოება

აფგან მუხთარლის მხარდამჭერები აფგან მუხთარლის საქმეზე საპარლამენტო საგამოძიებო კომისიის შექმნას ითხოვენ

დღეს თბილისის პარლამენტთან ჟურნალისტური ეთიკის ქარტიის ინიციატივით, აზერბაიჯანელი ჟურნალისტისა და აქტივისტის, აფგან მუხთარლის მხარდამჭერი აქცია გაიმართა.

სოლიდარობის აქციაზე მონაწილეობდნენ როგორც მედიის წარმოამდგენლები და მესამე სექტორი, ასევე მუხთარლის მეუღლე, ლეილა ისმაილოვამ.

მათ პარლამენტში განცხადება შეიტანეს, რომლის მიხედვით აზერბაიჯანელი ჟურნალისტის საქმეზე საპარლამენტო საგამოძიებო კომისიის შექმნა მოითხოვეს, ასევე მათთან შეხვედრისკენ მოუწოდეს პარლამენტის თავმჯდომარე ირაკლი კობახიძეს და საპარლამენტო უმრავლესობის წევრს სოფიო კილაძეს.

გარდა ამისა, აქციის მონაწილეებმა მოითხოვეს, გაირკვას, როგორ აღმოჩნდა აფგან მუხთარლი საქართველო-აზერბაიჯანის საზღვარზე.

თბილისის საკრებულოს დამოუკიდებელი დეპუტატის, ალეკო ელისაშვილის თქმით, ქართულმა მხარემ გადასცა აზერბაიჯანს მუხთარლი. დეპუტატის განცხადებით, ამ ფაქტის გამო მაღალი თანამდებობის პირებს პოსტიდან გადადგომა მოუწევთ.

„ერთმნიშვნელოვანია, რომ ჩვენი ქვეყნის სპეცსამსახურები დაეხმარნენ აზერბაიჯანს ამ კაცის გატაცებაში და დასაკლავი კრავივით წაიყვანეს საწამებლად და გადასცეს მათ. ამაში მე ეჭვი არ მეპარება.

ხელისუფლება ბოდავს და ერთიმეორისგან გამომრიცხავ განცხადებებს აკეთებს. სესიაშვილის განცხადება ინდურ სცენარს ჰგავს. მღებრიშვილის განცხადება აზერბაიჯანული პრესის მიმოხილვა იყო, ხოლო „სნეგურაჩკა“ კაცზე კი, საუბარი საერთოდ აღარ ღირს. ხელისუფლებას მოუწევს პასუხისგება, ჯეჯელავასა და ყველა ძალოვანს თანამდებობის დატოვება, ვინც ამაში ჩართული იყო“, - განაცხადა ელისაშვილმა.

აზერბაიჯანელი ჟურნალისტის მხარდამჭერი აქცია მესამე დღეა მიმდინარეობს. აქციები გაიმართა მთავრობის ადმინისტრაციისა და სუს-ის შენობებთან.

ანა მებურიშვილი