პოლიტიკა

ამ წუთამდე პოლიციის ჩარევა არსად საჭირო არ გამხდარა და იმედია, ისე ჩაივლის ეს პროცესი - გიორგი მღებრიშვილი

საქმეთა მინისტრმა გიორგი მღებრიშვილმა 2017 წლის ადგილობრივი თვითმმართველობის არჩევნებზე საკუთარი ხმა დააფიქსირა დიდუბის მერვე ოლქის #26 საარჩევნო უბანზე.

მინისტრმა იმედი გამოთქვა, რომ არჩევნები მშვიდად ჩაივლის.

„პოლიცია არის აპოლიტიკური, ჩვენ ვინარჩუნებთ ნეიტრალიტეტის პრინციპს. დღეს ჩემი არჩევანის შესახებ საჯაროდ განცხადებებს არ გავაკეთებ. პატივს ვცემ ჩვენი მოქალაქეების არჩევანს.

ჩვენი მხრიდან იქნება მაქსიმუმი გაკეთებული იმისთვის, რომ ყველას ხმა იყოს დაცული, მაღალი ევროპული სტანდარტის შესაბამისად. ჩვენ ყველა უბანზე გვყავს განაწილებული პოლიციელები, იმ დისტანციაზე, რასაც კანონი უშვებს და მაქსიმუმს გავაკეთებთ იმისთვის, რომ თავიდან იქნეს აცილებული ყველანაირი სამართალდარღვევა.

ამ წუთამდე პოლიციის ჩარევა არსად საჭირო არ გამხდარა და იმედია, ისე ჩაივლის ეს პროცესი“, - თქვა მღებრიშვილმა.

დღეს ადგილობრივი თვითმმარტველობის არჩევნები მიმდინარეობს. მოქალაქეები მთელი ქვეყნის მასშტაბით 64 საკრებულოს 2058 დეპუტატსა და 64 მერს პირდაპირი წესით 4 წლის ვადით ირჩევენ.

ანა მებურიშვილი