საზოგადოება

არ მოხდა აფეთქების ზონიდან ხალხის სათანადო მანძილზე გაყვანა - „საქნახშირის“ გენერალური დირექტორი

კომპანია „საქნახშირის“ გენერალური დირექტორის, ჯამბულ ჯაყელის განცხადებით, მინდელის შახტში მომხდარ ტრაგედიაში გარკვეული პირების შეცდომა იკვეთება.

როგორც ჯაყელმა განაცხადა, შახტში აფეთქებისას ხალხი სათანადო მანძილზე არ გაიყვანეს.

„არ მოხდა აფეთქების ზონიდან ხალხის სათანადო მანძილზე გაყვანა. ცვლის უფროსის, ცვლის ინჟინრის, უსაფრთხოების ინჟინრისა და ამფეთქებლის ოსტატის შეცდომა იკვეთება, რადგან არ იყვნენ დარწმუნებული აფეთქების უსაფრთხოებაში“, – განაცხადა ჯაყელმა.

მისივე თქმით, „საქნახშირის“ ადმინისტრაცია მზადაა, დააკმაყოფილოს მეშახტეების მოთხოვნა და თანამდებობიდან გაათავისუფლოს შახტის თანამშრომლები.

მეშახტეები კომპანიის გენერალური დირექტორის მოადგილის გია ქარქაშაძის, შახტის მთავარი ინჟინრის გიზო კირკიტაძისა და შახტის მენეჯერის აკაკი ახვლედიანის გათავისუფლებას ითხოვენ.

„ვინაიდან ახლა იძულებითი გაჩერების რეჟიმში ვართ, სამუშაოების განახლების შემდეგ განვიხილავთ მეშახტეების მოთხოვნას მაღალი თანამდებობის პირების გათავისუფლების შესახებ“, – განაცხადა ჯამბულ ჯაყელმა.

მინდელის შახტში მომხდარ შემთხვევას 16 ივლისს ოთხი ადამიანი ემსხვერპლა, დაშავებულია ექვსი ადამიანი.