რეგიონები

არავითარი დაგუბება არ არის, მსგავსი საფრთხე არ არსებობს, არც გუშინ იყო და არც დღეს არ არის - გიორგი მღებრიშვილი

საგანგებო სიტუაციების მართვის სამსახურის უფროსი, გიორგი მღებრიშვილი სვანეთში, სტიქიის ზონაში იმყოფება. მისი თქმით, ამ ეტაპზე მოსახლეობას საფრთხე არ ემუქრება და არც რაიმე დაგუბების მსგავსი აღინიშნება მდინარე ნენსკრას კალაპოტში:

„გუშინდელთან შედარებით დაიკლო წყლის დონემ. შემოფრენა მოვახდინეთ, დღეს უნდა დავიგეგმოთ კონკრეტულ სამუშაოებზე. არავითარი დაგუბება არ არის, მსგავსი საფრთხე არ არსებობს, არც გუშინ იყო და არც დღეს არ არის. პრევენციულ ღონისძიებებს გავატარებთ. თუ სადმე საჭირო იქნება ევაკუაცია, მოვახდენთ ევაკუაციას. შეიძლება ითქვას, რომ მოსახლეობა უსაფრთხოდ არის. მთავარია, პირველ ეტაპზე მსხვერპლი არ გვაქვს და მოვახდინეთ დროული რეაგირება“, - განაცხადა მღებრიშვილმა.

ცნობისთვის, სოფელ ჭუბერში, სადაც ნენსკრაჰესს აშენებენ, სამაშველო სამუშაოები მთელი ღამის განმავლობაში მიმდინარეობდა. ჭუბერში გამემგზავრა საქართველოს პრემიერ-მინისტრი მამუკა ბახტაძე.

უხვი ნალექის გამო მთის დიდი ნაწილი ჩამოიშალა, რასაც მოჰყვა მდინარე ნენსკრას ადიდება. დატბორილია მიმდებარე ტერიტორია. სოფელი ჭუბერი და კიდევ რამდენიმე დასახლება გარესამყაროსაა მოწყვეტილი. ჩამოწოლილმა მეწყერმა და მოვარდნილმა ღვარცოფმა სოფლებთან დამაკავშირებელი ხიდები და რამდენიმე სახლი წაიღო.