არქივი
საზოგადოება
ავსტრიის ერთ-ერთმა კლინიკამ თამერლან მაჩალიკასვილის მიღების მზადყოფნა გამოთქვა
პანკისის ხეობის სოფელ დუისში ჩატარებული სპეცოპერაციის შედეგად დაჭრილი თემირლან მაჩალიკაშვილის მიღების მზადყოფნა ავტსრიის ერთ-ერთმა კლინიკამ გამოთქვა. ამის შესახებ ჟურნალისტებს წმინდა მიქაელ მთავარანგელოზის სახელობის კლინიკური საავადმყოფოს ექიმმა ზაზა ლურსმანაშვილმა განუცხადა.
ტრანსპორტირებისთვის ერთადერთ დაბრკოლებას ის წარმოადგენს, რომ ამ ეტაპზე ავსტრიულ კლინიკაში თავისუფალი ადგილები არაა.
„ავსტრიის კლინიკამ, ვისთანაც ჯანდაცვის სამინისტრო აწარმოებდა მოლაპარაკებას, პრინციპული თანხმობა განაცხადა პაციენტის მიღებაზე. მაგრამ ერთადერთ დაბრკოლებად ამ ეტაპზე რჩება ის გარემოება, რომ ამ მომენტისთვის თავისუფალი ადგილი არ არის და იმედოვნებენ, რომ სავარაუდოდ 24 საათში ალბათ ადგილი გამოჩნდება და დადგება პაციენტის ტრანსპორტირების საკითხი“, -თქვა ექიმმა.
ლურსმანაშვილმა განაცხადა, რომ არ ფლობს ინფორმაციას, თანხმობის შემთხვევაში აიღებს თუ არა ტრანსპორტირებაზე პასუხისმგებლობას ავსტრიული კლინიკა.
„ამ დეტალებზე ინფორმაცია ჯერ არ გამაჩნია, მაგრამ როდესაც საბოლოო პასუხს მივიღებთ და იქნება სრული მზადყოფნა პაციენტის მისაღებად, ამ საკითხს შემდეგ განვიხილავთ. ალბათ აიღებს პასუხისმგებლობას კლინიკა“, -უთხრ ა ლურსმანაშვილმა ჟურნალისტებს.
გარდა ამისა მაჩალიკაშვილის მიღებასთან დაკავშირებით დღის ბოლომდე ელოდებიან პასუხს თურქეთის კლინიკიდან.
ანა მებურიშვილი