საზოგადოება

აზიური ფაროსანას პრობლემის მოსაგვარებლად საქმეში შესაძლოა, ავიაციაც ჩაერთოს

დასავლეთ საქართველოში მომრავლებული მავნებელი მწერის - აზიური ფაროსანას პრობლემის მოსაგვარებლად საქმეში შესაძლოა, ავიაციაც ჩაერთოს.

საკითხის შესახებ პარლამენტის საშემოდგომო სესიის პირველ პლენარულ სხდომაზე აგრარულ საკითხთა კომიტეტის თავმჯდომარემ, ოთარ დანელიამ, ისაუბრა.

მმართველ გუნდის წარმომადგენლის ინფორმაციით, მავნებელი მწერი, სავარაუდოდ, გალის რაიონიდან შემოვიდა და ოკუპირებულ აფხაზეთში ანალოგიური სიტუაციაა.

საქართველოს ხელისუფლება ოკუოპირებული რეგიონის მოსახლეობისთვის დასახმარების აღმოსაჩენად მზადყოფნას გამოთქვამს.

„ეს უკვე ცდება სოფლის მეურნეობის სამინისტროს კომპეტენციას და გაცილებით უფრო დიდ მასშტაბს იძენს. არ არის გამორიცხული, აუცილებელი გახდეს გარემოს დაცვის სამინისტროს ჩართვაც, ვინაიდან, მიგრაცია მავნებლისა მოხდება, სწორედ რომ ტყეებში და დაცულ ტერიტორიებში და ალბათ კომპლექსური ღონისძიებების გატარება იქნება საჭირო. არ არის გამორიცხული, ასევე, საჭირო გახდეს ავიაციის ჩართვა,“ - განაცხადა ოთარ დანელიამ.

ცნობისათვის, აზიური ფაროსანას მომრავლების შედეგად, დასავლეთ საქართველოში მოსახლეობას თხილის და სხვა სახის მოსავალი გაუფუჭდა.