საზოგადოება

„ბავშვთა სამყაროს“ მოვაჭრეები პროკურატურის წარმომადგენლებს შეხვდნენ

სავაჭრო ცენტრ „ბავშვთა სამყაროში“ მომხდარი ხანძრის შედეგად დაზარალებულ მოვაჭრეთა ნაწილი პროკურატურის წარმომადგენელს შეხვდა. დაზარალებულთა ადვოკატის, მარიკა არევაძის განცხადებით, საუბრის ძირითადი თემა მოვაჭრეებისთვის დაზარალებულთა სტატუსის მინიჭებას ეხებოდა.

არევაძის თქმით, პროკურატურა დაპირდა, რომ საქმეს ეფექტურად გამოიძიებს.

„ძირითადად იყო საუბარი დაზარალებულის სტატუსის მინიჭებაზე. გაჟღერდა ყველა პრეტენზია, რაც დაზარალებულებს გამოძიების მიმართ გააჩნიათ. დაგვპირდნენ ყველა მიმართულებით რეაგირებას. უპირველეს ყოვლისა, ველოდებით, რომ რაც შეიძლება სწრაფად მოხდება ამ ხალხის დაზარალებულად ცნობა და ხანძარზე პასუხიმგებელი სუბიექტის ვინაობის დადგენა“, - განაცხადა არევაძემ.

დღეს ხანძრისგან დაზარალებულმა მოვაჭრეებმა თბილისის მთავარ პროკურატურასთან აქცია გამართეს. მათ მოითხოვეს, რომ დაზარალებულის სტატუსი მიანიჭონ. პროტესტის ნიშნად რამდენიმე მოვაჭრემ ხელბორკილები დაიბა.

წინა კვირას სავაჭრო ცენტრ „ბავშვთა სამყაროში“ გაჩენილი ხანძრის შედეგად დაზარალებულმა მოვაჭრეებმა საკრებულოს ფრაქციის „ქართული ოცნება - დემოკრატიული საქართველოსთვის“ თავმჯდომარის რიმა ბერაძის მიერ შეთავაზებულ 3000-ლარიან ერთჯერად კომპენსაციაზე უარი თქვეს. მოვაჭრეების განმარტებით, ეს წინადადება უსამართლოა და ვერ ფარავს მათ ფინანსურ ზარალს. ისინი მინიმუმ, 5000-ლარიანი კომპენსაციის გაცემას ითხოვენ.

შეგახსენებთ, რომ სავაჭრო ცენტრ „ბავშვთა სამყაროში“ ხანძარი 30 იანვარს გაჩნდა, რომლის შედეგად 1000-ზე მეტი მოვაჭრე დაზარალდა. გამოძიება ხანძრის გამომწვევ მიზეზებზე ამ დრომდე მიმდინარეობს.

ანა მებურიშვილი