კომენტარი

ბეირუთის ტრაგედიისა და შვიდი წლის წინ საქართველოში დატვირთული გემის ერთმანეთთან დაკავშირება უსაფუძვლოა - ნათია თურნავა

ბეირუთის ტრაგედიისა და შვიდი წლის წინ საქართველოში დატვირთული გემის ერთმანეთთან დაკავშირება უსაფუძვლოა, – ამის შესახებ ეკონომიკისა და მდგრადი განვითარების მინისტრმა, ნათია თურნავამ განაცხადა.

როგორც თურნავამ აღნიშნა, ექსპორტიორი ქვეყანა ამ შემთხვევაში პასუხს ვერ აგებს.

"ამონიუმის გვარჯილა არის აზოტოვანი სასუქი, რომელიც იწარმოება მთელ მსოფლიოში და წლებია, უკვე საქართველოც აწარმოებს და ეს არის ჩვენი ერთ-ერთი მნიშვნელოვანი საექსპორტო პროდუქტი, რომელიც სოფლის მეურნეობისთვის მოიხმარება, მაგრამ, რა თქმა უნდა, თუ კი მისი მოხმარებისა და შენახვის ტექნოლოგია დაცული არაა, შეიძლება, საკმაოდ სავალალო შედეგები მივიღოთ.

2013 წელს ამ გემის დატვირთვა ამ პროდუქციით ერთ-ერთ ჩვენს პორტში, ყველა უსაფრთხოების წესების დაცვით მოხდა. ეს იყო 7 წლის წინ. ამ დროის განმავლობაში ვინ შეიძინა, სად იმყოფებოდა ეს საქონელი, რა პირობებში იყო შენახული, რა ტექნიკური გამართულობა თუ გაუმართაობა ჰქონდა გემს, ამაზე ექსპორტიორი ქვეყანა ვერ აგებს პასუხს. მცდელობა, რომ ეს სავალალო ფაქტი და 7 წლის წინ ჩვენთან დატვირთული გემი დავაკავშიროთ ერთმანეთთან, არის უსაფუძვლო", - აცხადებს თურნავა.

ბეირუთის პორტში დასაწყობებული ამონიუმის ნიტრატი, 2013 წელს საქართველოდან მოზამბიკში გადაჰქონდა გემს სახელწოდებით Rhosus. ხსენებული გემი, მედიის ცნობით, მოლდოვის დროშის ქვეშ ცურავდა.

ეს ინფორმაცია ლიბანურმა ტელეარხმა LBCI გაავრცელა.

შეგახსენებთ, ლიბანის დედაქალაქში 4 აგვისტოს მომხდარ ორ აფეთქებას მასშტაბური ნგრევა და მსხვერპლი მოჰყვა. ამ დროის ცნობებით, გარდაცვლილია, სულ მცირე, ასი და დაშავებულია 4000-ზე მეტი ადამიანი.