სამართალი
ბიძინა ივანიშვილის განცხადება, რომ `ომეგას` ფარული ჩანაწერების საქმეს, უცხოელი გამომძიებლები იძიებენ, სიცრუე აღმოჩნდა
23 ოქტომბრის ტელეინტერვიუს დროს ყოფილი პრემიერი, ბიძინა ივანიშვილი ამტკიცებდა, რომ ოთარ ფარცხალაძის საქმის გამოძიებაში, რომელიც "ომეგას" საქმეზე ფარულ ჩანაწერებს ეხება, უცხოელი სპეციალისტები ჩაერთვნენ.
თუმცა აღმოჩნდა, რომ საქართველოს პროკურატურის მრჩეველთა საერთაშორისო ჯგუფის წევრები გამოძიების დასკვნით ეტაპზე არსებულ, გახმაურებულ სისხლის სამართლის საქმეებს სწავლობენ და მათ შორის "ომეგას" საქმე არ არის.
პროკურატურის ინფორმაციით, საუბარია ფარცხალაძის კუთვნილი კომპანიისთვის მიწის გადაცემის კანონიერებასა და თორდია-ფარცხალაძის დაპირისპირებაზე. "ომეგას" საქმეზე უცხოელი სპეციალისტების მონაწილეობის შესახებ არაფერი იციან ადვოკატებმა. უფრო მეტიც, უფლებადამცველები ამბობენ, რომ პროცედურა ქვეყნის კანონმდებლობასთან წინააღმდეგობაში მოდის.
"საქართველოში მოქმედი სისხლის სამართლის საპროცესო კოდექსი, არ ითვალისწინებს უცხო ქვეყნის საგამოძიებო უწყებების ჩართვას საქართველოში მომხდარ ფაქტზე. პროფესიით იურისტი არ არის და იმ ჭრილში რა ჭრილშიც გაკეთდა განცხადება, სისხლის სამართლის კანონმდებლობასთან შესაბამისობაში ვერ მოდის,"- აცხადებს ლევან ყიფიანის ადვოკატი, შალვა ხაჭაპურიძე.
თავის მხრივ, "ომეგა ჯგუფის" საქმეში უცხოელი პროკურორების ჩართვას უარყოფს კომპანიის უფლებადამცველი, გიორგი ფანცულაია. იგი აცხადებს რომ ობიექტური გამოძიებისთვის არა სხვა ქვეყნის წარმომადგენლები, არამედ პოლიტიკური ნებაა აუცილებელი.
"არცერთი პროკურორი და არც ერთი გამომძიებელი, რომელიც "ომეგას" საქმეს იძიებს, არ არის უცხოელი. მიმაჩნია, რომ არასწორი ინფორმაცია აქვს ბატონ ბიძინა ივანიშვილს თუ ამ საქმეს გულისხმობდა როცა ის უცხოელ პროკურორზე საუბრობდა, მაგრამ აქვე დავძენ, რომ არც უცხოელი პროკურორის არსებობა არ ნიშნავს საქმის ობიექტურ გამოძიებას. ობიექტურ გამოძიებას არ სჭირდება უცხო ქვეყნის მოქალაქე, ამას სჭირდება პოლიტიკური ნება და დამოუკიდებლობა გამოძიებას და პროკურატურას, რომ გაბედოს და დაიბაროს ყველა ის პირი რომელიც გამოსაკითხი არის, მათ შორის ბატონი ოთარი, თუ ნახსენები ყოფილი თუ მოქმედი თანამდებობის პირები,"- აცხადებს გიორგი ფანცულაია.
თავად ფარცხალაძის ადვოკატი კი მიიჩნევს, რომ მისი დაცვის ქვეშ მყოფის გამოკითხვის სამართლებრივი საფუძველი არ არსებობს.
"ვინაიდან ინფორმაციის მატარებელი არ გახლავთ ბატონი ოთარი, მისი დაკითხვის სამართლებრივი საფუძველი არ არსებობს. ჩვენ მხარეს ფიზიკურად, სამართლებრივად შეუძლებელია რომ წარმოვადგენდეთ, ვინაიდან ამის სამართლებრივი საფუძველია რ არის, შესაბამისად, ჩვენ ამ კუთხით ინფორმაციას, თუ რა სახის საგამოძიებო მოქმედება ტარდება, ნამდვილად ვერ გეტყვით,"- აცხადებს ოთარ ფარცხალაძის ადვოკატი გაგი მოსიაშვილი.