კომენტარი

ბიძინა ივანიშვილს დღეს ,,ქართული ოცნება’’ ჰყავს გარკვეული ტესტირების რეჟიმში - გია ხუხაშვილი

ექსპერტი პოლიტიკის საკითხებში გია ხუხაშვილი ყოფილი პრემიერის, ბიძინა ივანიშვილის გუშინდელ გამოჩენას გამოეხმაურა, რომელიც საზოგადოებამ აჭარაში, ქეთი მელუას კონცერტზე დააფიქსირეს.

როგორც ხუხაშვილმა ტვ ,,პირველის’’ ეთერში განაცხადა, საჯარო აქტივობა არ არის პოლიტიკის მთავარი შემადგენელი ნაწილი და მისი თქმით, ბიძინა ივანიშვილი დაკვირვების რეჟიმშია და აკვირდება თავის გუნდს.

,,ყველაფერი არის გარკვეული ტაქტიკის ნაწილი. ბოლო პერიოოდშო, რა თქმა უნდა, იგრძნობა, რომ ბიძინა ივანიშვილი გარკვეულწილად დისტანცირებულია პოლიტიკური პროცესიდან და ეს დაეტყო კიდეც მმართველობით სისტემას, რომელშიც სრული ქაოსია. გვყავს პრემიერ-მინისტრი, რომელიც ამბობს, რომ პოლიტიკაში არ ერევა. გვყავს პარლამენტის თავმჯდომარე, რომელმაც დაიწყო რაღაც პომპეზური პროცესი და სრულიად ჩააგდო და მიდევნებულ კონსენსუსზე დაიწყო საუბარი. სრული ქაოსია მმართველობაში და ნამდვილად დაეტყო, რომ ბიძინა ივანიშვილი არის დისტანცირებული.

მეორეს მხრივ, ჩვენ ყველას უნდა გვესმოდეს, რომ დღესაც ბიძინა ივანიშვილის ნიშნით მიდის პოლიტიკური პროცესი. მიუხედავად იმისა, ის ერევა, მონაწილეობს თუ არ მონაწილეობს, ეს ასეა. ,,ქართული ოცნება’’, რომელმაც ვერ მოახერხა ლიდერების გენერაცია თავის წიაღში, მთლიანად პარაზიტირებს ისევ და ისევ ბიძინა ივანიშვილის რესურსებზე. ანუ, სახელმწიფო სტაბილურობის ერთადერთი გარანტი ისევ და ისევ არის ბიძინა ივანიშვილი ინერციულად, მიუხედავად იმისა, ის მონაწილეობს თუ არა რაღაც გადაწყვეტილებების მიღებაში.

მე ვფიქრობ, მას დღეს ,,ქართული ოცნება’’ ჰყავს გარკვეული ტესტირების რეჟიმში. საყოფაცხოვრებო ენაზე რომ გადავთარგმნოთ, ეს არის სიტუაცია, როდესაც მამა ცდილობს, რომ თავის თინეიჯერ შვილს მისცეს გარკვეული თავისუფლება და შორიდან დააკვირდეს რამდენად სიცოცხლისუნარიანია რეალურ ცხოვრებასთან კომუნიკაციაში.

მე არ მგონია, რომ ბიძინა ივანიშვილი კმაყოფილი იყოს თავისი თინეიჯერი შვილის მოქმედებებით ამ თავისუფალ რეჟიმში, იმიტომ, რომ პირველი რაც გააკეთა ამ შვილმა, წავიდა, დათვრა სადღაც და შესაძლოა, ჯერჯერობით მსუბუქი ნარკოტიკები გამოიყენა. მძიმე ნარკოტიკებზე ეს ხელისუფლება ჯერ არ გადასულა.

დაინახა, რომ არ არის ეს ახალგზრდა მომწიფებული, რომ თვითონ იფუნქციონიროს. ამ ფაზაში ვართ დღეს’’, - განაცხადა გია ხუხაშვილმა.

ნინო ექვთიმიშვილი