კომენტარი

ბოკერიამ მითხრა სახალხო დამცველი ხარ და კანონის უზენაესობა უნდა იყოს შენთვის მნიშვნელოვანი და არა საზოგადოებრივი აზრიო - სოზარ სუბარი

ლტოლვილთა და განსახლების მინისტრმა, ყოფილმა სახალხო დამცველმა სოზარ სუბარმა სანდრო გირგვლიანის მკვლელობის საქმეზე მიმდინარე პროცესზე, ჩვენება მისცა.

სუბარმა პროცესზე გაიხსენა, რომ გირგვლიანის საქმეზე მას შეხვედრა ზურაბ ადეიშვილის კაბინეტში ვანო მერაბიშვილთან და გიგა ბოკერიასთან ქონდა.

ყოფილი სახალხო დამცველის თქმით, შეხვედრაზე გიგა ბოკერიამ მას შეახსენა, რომ სახალხო დამცველი იყო, შესაბამისად კანონის უზენაესობის მომხრე უნდა ყოფილიყო.

"ბოკერიამ დაიჭირა ერთი ჩემი ფრაზა, საზოგადოებრივ აზრს რომ ვახსენებდი, რომ უნდა დააკავონ დამნაშაავეები საზოგადოების აზრი ასეთი იყო. ეს ფრაზა რამდენჯერმე გაიმეორა ბოკერიამ და მითხრა, შენ სახალხო დამცველი ხარ და კანონის უზენაესობა უნდა იყოს შენთვის მნიშვნელოვანი და არა საზოგადოებრივი აზრიო", - განაცხადა სოზარ სუბარმა.

მისი თქმით, მან პირდაპირ თქვა, რომ ვანო მერაბიშვილი უნდა გადადგეს, რადგან გირგვლიანის საქმეში მისი ახლო გარემოცვის ჩართულობა იკვეთება.

სუბარის თქმით, მან პარლამენტს წარუდგინა ანგარიში, რასაც რეაგირება არ მოჰყოლია.

"შემდეგ ყველა ჩემს მოხსენებაში მეორდებოდა გირგვლიანის საქმე. მე შევხვდი მე-7 დაწესებულებაში ამ საქმეზე დაკავებულებსაც. მოდიოდა ჩვენთან ინფორმაციები, რომ დაკავებულები განსხვავებულ პირობებში იყვნენ და ომის დროს, საერთოდ გაყვანილი ჰყავდათ. ეს ადამიანები საქმეებს არჩევდნენ და ბიზნესებს აგვარებდნენ ციხიდან. განათლების მინისტრის მაშინდელი მოადგილე მოვიდა ჩემთან და მთხოვა დავხმარებოდი, რომ ეს ადამიანი ციხიდან ართმევდა კომპანიას. ციხეში ისინი არა მხოლოდ განსხვავებულ პირობებში იყვნენ, არამედ ვითარებას მართავდნენ გარედანაც", - განაცხადა სუბარმა.

სოზარ სუბარმა ისაუბრა გირგვლიანის მკვლელობისთვის მსჯავრდებულების შეწყალებაზეც.

სუბარის თქმით, აკაკი მინაშვილის და ჩიორა თაქთაქიშვილის მონაწილეობით, შეწყალების კომისიაში არც ერთი არ იყო ლოიალური ჩვენს რეკომენდაციებში, განსხვავებით ნიკა რურუასა და ნიკა გვარამიასგან, რომლებიც შემწყნარებლები იყვნენ შედარებით.

"თუმცა საბოლოო სია 50%-ით თითქმის იცვლებოდა. გირგვლიანის საქმეზე მსჯავრდებულების შეწყალება კი მოხდა კომისიის საერთოდ გვერდის ავლით. ცხადია, მათ შეწყალებას მხარს არ დავუჭერდი", - განაცხადა სოზარ სუბარმა.

მისი თქმით, რაც შეეხება საქმეს, სახალხო დამცველის ოფისმა სრული რეალობა იცოდა.

"ეს ყველაფერი ქმნიდა იმის განცდას, რომ საქმე გვქონდა ადამიანის უფლებებია რღვევასთან და ეს არ იყო კრიმინალი .ცივსისხლიანი მკვლელები - ასე შევაფასე მაშინ საჯარო განცხადებაში გირგვლიანის საქმის მონაწილეები. მათში ვიგულისხმე ახალაია, მელნიკოვი და ყველა ვინც იმ სუფრასთან იჯდა და ცდილობდნენ ბრალი სხვაზე გადაეტანათ", - განაცხადა სუბარმა.