საზოგადოება

ბოლო დღეებში გავრცელებული მითქმა-მოთქმიდან გამომდინარე გადავწყვიტე, პირადად ვუხელმძღვანელო ფრანკფურტის წიგნის ბაზრობის პროექტს - მიხეილ გიორგაძე

კულტურისა და სპორტის მინისტრი მიხეილ გიორგაძე გამოეხმაურა ფრანკფურტის წიგნის ბაზრობის მომზადების ირგვლივ ატეხილ აჟიოტაჟს. მისი განმარტებით, ბოლო დღეებში მედიასა და სოციალურ ქსელებში აგორებული მითქმა-მოთქმის გამო აღნიშნულ პროექტს თავად უხელმძღვანელებს.

„ფრანკფურტის წიგნის ბაზრობის გადაუჭარბებლად სახელმწიფოებრივი მნიშვნელობიდან გამომდინარე და იმ არაჯანსაღი აჟიოტაჟისა და მითქმა-მოთქმიდან გამომდინარე, რაც ბოლო დროს გავრცელდა, როგორც მედიაში, ასევე სოციალურ ქსელებში, მივიღე გადაწყვეტილება, რომ პირადად ვუხელმძღვანელო ამ პროექტს და არა მხოლოდ პოლიტიკურ პასუხისმგებლობასა და ხელმძღვანელობას ვგულისხმობ, არამედ თითოეული მიმართულების ოპერაციულ ხელმძღვანელობას. მე პირადად ვუხელმძღვანელებ თითოეულ მიმართულებას, ოპერაციული და ტექნიკური საკითხების ჩათვლით“, -თქვა მინისტრმა.

ფრანკფურტის წიგნის ბაზრობის ხელმძღვანელი მინისტრის მოადგილე მანანა ბერიკაშვილი უნდა ყოფილიყო, თუმცა მან პროექტი დატოვა.