საზოგადოება

ბორჯომის ხეობაში შეიარაღებული ძალების გამოყენების საჭიროება არ დგას - გიორგი აბაშიშვილი

საქართველოს პრეზიდენტი, გიორგი მარგველაშვილი ბორჯომის ხეობაში ჩავიდა და ადგილზე ვითარებას ეცნობა.

პრეზიდენტის ადმინისტრაციის ხელმძღვანელის, გიორგი აბაშიშვილის განცხადებით, პრეზიდენტი ჩართული იყო პროცესებში და დეტალურ ინფორმაციას იღებდა ბორჯომის ხეობაში არსებულ ვითარებაზე.

აბაშიშვილის ინფორმაციით, შეიარაღებული ძალები მხოლოდ ატენის ხეობაში გამოიყენეს, ხოლო ბორჯომის ხეობაში ამის საჭიროება არ დგას.

„გამოიცა განკარგულება შეიარაღებული ძალების გამოყენების თაობაზე საგანგებო სიტუაციების მართვის მიზნით. თუმცა ამ ეტაპზე შეიარაღებული ძალები გამოყენებულია მხოლოდ ატენის ხეობაში. ბორჯომის ხეობაში ჯერჯერობით საჭიროება არ დგას შეიარაღებული ძალების გამოყენების, თუმცა საჭიროების შემთხვევაში, გამოყენებული იქნება“, - თქვა აბაშიშვილმა ბორჯომის ხეობაში ყოფნისას.

შეგახსენებთ, ბორჯომის ხეობაში ცეცხლი 20 აგვისტოს გაჩნდა. ამ ეტაპისთვის ხანძარი ლოკალიზებულია. რაც შეეხება ატენის ხეობას, იქ ცეცხლი ლიკვიდირებულია და 2 დღის განმავლობაში ნახანძრალის მონიტორინგი ჩატარდება.

ანა მებურიშვილი