მსოფლიო

ჩემი ექსტრადირება უკრაინისა და საქართველოს ხელისუფლებების შეცვლას გამოიწვევს - მიხეილ სააკაშვილი

საქართველოს ყოფილმა პრეზიდენტმა, მიხეილ სააკაშვილმა განაცხადა, რომ მისი ექსტრადირება მთავრობას შეცვლის როგორც უკრაინაში, ასევე საქართველოში.

„უკრაინის მთავრობა, რომელიც ჩემს ექსტრადირებას განახორციელებს, გამოიწვევს ხელისუფლების შეცვლას არა მარტო უკრაინაში, არამედ საქართველოშიც“, - განაცხადა ოდესის ექს-გუბერნატორმა დღევანდელ ბრიფინგზე.

სააკაშვილის თქმით, ქართული სამართალდამცავი სტრუქტურები მის მხარეს დაიჭერენ.

„საქართველოს სამართალდამცავი ორგანოების, შეიარაღებული ძალებისა და სახელმწიფო აპარატის უმეტესობა ჩემი შექმნილია და ისინი ჩემს მხარეს არიან. ეს არავისთვის არაა საიდუმლო. ისინი ვერ მოახერხებენ ჩემს დიდხანს გაჩერებას ქართულ ციხეში. ჯერ ერთი, ეს სასაცილო იქნება მსოფლიოსთვის, მაშინ მსოფლიოს ყველა პრეზიდენტი უნდა ჩასვა. მეორე, ქართველი ხალხი მათ [მთავრობას] დაამხობს და ამას ყველანაირად ხელს შევუწყობ“, -აღნიშნა სააკაშვილმა.

დღეს თბილისის საქალაქო სასამართლოს მოსამართლემ სანდრო გირგვლიანის საქმეზე მიხეილ სააკაშვილი დამნაშავედ ცნო და 3 წლით თავისუფლების აღკვეთა მიუსაჯა. ამას გამოეხმაურა უკრაინელი პარლამენტარი იგორ მოსიიჩუკი. მისი შეფასებით, ქართული სასამართლოს გადაწყვეტილება ოდესის ყოფილი გუბერნატორის უკრაინიდან დეპორტაციის საფუძველს იძლევა.

ანა მებურიშვილი