პოლიტიკა

ჩემი გატაცების უკან საქართველოს პრემიერ-მინისტრი დგას - აფგან მუხთარლი

თბილისში გაუჩინარებული და აზერბაიჯანში დაკავებული ჟურნალისტის აფგან მუხთარლის მტკიცებით, მისი გატაცების უკან საქართველოს პრემიერ-მინისტრი, გიორგი კვირიკაშვილი დგას. ამის შესახებ მან რუსთავი 2-თან ინტერვიუში თქვა.

როგორც ჟურნალისტმა გაიხსენა, ის თბილისიდან კრიმინალური პოლიციის თანამშრომლებმა გაიტაცეს.

„თბილისიდან მე საქართველოს კრიმინალურმა პოლიციამ გამიტაცა. ამ დანაშაულის უკან საქართველოს პრემიერ-მინისტრი დგას. მოკითხვას გადავცემ ქართველ ხალხს. თითქმის, სამი წლის განმავლობაში ვცხოვრობდი თბილისში.

ვფიქრობ, ყველაფერი კარგად იქნება. ქართველი ხალხი აღარ მოითმენს კვირიკაშვილის მთავრობას, მან მისცა უფლება, რომ მე გავეტაცებინე, მას რომ ამის ნებართვა არ გაეცა, არ მომიტაცებდნენ, ეს იყო ალიევსა და კვირიკაშვილს შორის შემდგარი შეთანხმების შედეგი. მე ვფიქრობ, რომ თავდაპირველად, აზერბაიჯანულ მხარეს სურდა, რომ საქართველოს ხელისუფლებას ჩემი თავი მათთვის კანონიერად გადაეცა, მაგრამ ეს ქართულ მხარეს არ გამოუვიდა, რადგან ჩემი დაპატიმრებისა და დეპორტაციის არანაირი საფუძველი არ არსებობდა. ამის შემდეგ ჩემი გატაცება მოიფიქრეს“, -თქვა მუხთარლიმ.

მუხთარლი აზერბაიჯანული ციხიდან 2 დღით გაუშვეს, რათა ის დასწრებოდა ზაქათალაში დის, დისშვილისა და ძმისშვილის გარდაცვალებასთან დაკავშირებულ სამგლოვიარო ღონისძიებებს.

აზერბაიჯანის სასამართლომ აფგან მუხთარლის ექვსი წლით თავისუფლების აღკვეთა მიუსაჯა.