საზოგადოება

ჩემი პოზიცია არ უნდა აღიქმებოდეს, როგორც საზოგადოებრივი მაუწყებლის სარედაქციო დამოუკიდებლობაში ჩარევა - უჩა ნანუაშვილი

სახალხო დამცველმა უჩა ნანუაშვილმა განაცხადა, რომ მზადაა შეხვდეს საზოგადოებრივი მაუწყებლის მენეჯმენტს და განიხილოს მათი ხედვა არხის რეფორმირებასთან დაკავშირებით.

ომბუდსმენის თქმით, მისი პოზიცია არხზე მიმდინარე პროცესებთან დაკავშირებით არ უნდა აღიქმებოდეს, როგორც სარედაქციო დამოუკიდებლობაში ჩარევის მცდელობა.

„მზად ვართ, ნებისმიერ დროს ვისაუბროთ და გავაგრძელოთ დისკუსია. კიდევ ერთხელ ხაზს ვუსვამ, დისკუსიაში მონაწილეობა არ ნიშნავს სარედაქციო დამოუკიდებლობის დარღვევასა და რაღაცაში ჩარევას“, - განაცხადა ნანუაშვილმა.

საზოგადოებრივი მაუწყებლის გენერალური დირექტორის, ვასილ მაღლაფერიძის თქმით, ომბუდსმენი გარკვეულ დეტალებში ინფორმირებული არაა.

„მე ვფიქრობ, რომ იქ გარკვეულ საკითხებთან დაკავშირებით სახალხო დამცველს ბოლომდე არ ჰქონდა ზუსტი ინფორმაცია. ჩვენ ის მოვიწვიეთ, ხვალ თუ ზეგ გაიმართება შეხვედრა. ვფიქრობ, რომ აქ საბოლოოდ ყველაფერი გაირკვევა, იმიტომ რომ აქ ისეთი არაფერი განსაკუთრებული არ ხდება, რაც შეიძლება გამოიწვიოს სახალხო დამცველის შეშფოთება“, - განაცხადა ვასილ მაღლაფერიძემ.

შეგახსენებთ, რომ არხის ახალი გენერალური დირექტორი ვასილ მაღლაფერიძე და მისი გუნდი აპირებს არხის რეფორმის პროცესში, დახუროს ყველა ის გადაცემა, რომლის რეიტინგი არხის საშუალო მაჩვენებელზე დაბალია.

ანა მებურიშვილი