არქივი
საზოგადოება
ჩემთვის მიუღებელია, რომ ნარკოტიკის მოხმარებისთვის ადამიანს ციხეში სვამენ - გიორგი მარგველაშვილი
საქართველოს პრეზიდენტი, გიორგი მარგველაშვილი განაგრძობს კამპანიას „კონსტიტუცია ყველასია“, რომლის ფარგლებში მან „ფაბრიკაში“ შეხვედრა გამართა ახალგაზრდებთან.
კონსტიტუციაზე მსჯელობა კითხვის დასმის რეჯიმში მიმდინარეობდა, ერთ-ერთი საკითხი კი ქვეყანაში არსებულ ნარკოპოლიტიკას ეხებოდა, კერძოდ, არღვევს თუ არა არსებული მიდგომა ადამიანთა უფლებებს.
საქართველოს პრეზიდენტის თქმით, მისთვის მიუღებელია ადამაინის ციხეში ჩასმა ნარკოტიკების მოხმარების გამო.
„ჩემთვის მიუღებელია, როდესაც ადამიანს, რომელსაც არ ჩაუდენია კრიმინალი, არც არავინ მოუკლავს, არც არავინ გაუძარცვავს, არც არავისზე უძალადია, ციხეში სვამენ, რადგან მოიხმარა ნარკოტიკი. ეს ჩემთვის გაუგებარია“, - თქვა მარგველაშვილმა.
მან ასევე აღნიშნა, რომ თავისუფლება „შეცდომების დაშვებასაც“ ითვალისწინებს.
„თავისუფლება ის კი არ არის, რომ ჩვენ სწორ არჩევანს გავაკეთებთ, მათ შორის თავისუფლება შეცდომების დაშვების უფლებაცაა. მე თუ გეტყვი, რომ თავისუფალი იყავი, მაგრამ მომისმინე, ეს, ეს, ეს არის სწორი, სხვა რამე არ გააკეთო, თავისუფალი ხარ და აირჩიე, რასაც მე გეტყვი, რაც მე მიმაჩნია სწორად, ის. და ეს არ არის თავისუფლება. თავისუფლებას როდესაც ადამიანს აძლევ, მას აძლევ შეცდომების დაშვების უფლებას. ესაა მნისვნელოვანი და თუ ეს ადამიანი, რომელიც მოიხმარს ნარკოტიკს, თავის თავს აზიანებს, ეს მისი თავისუფლებაა და მას ამის გამო ციხეში არ უნდა ვსვამდეთ“, - განაცხადა პრეზიდენტმა.
ანა მებურიშვილი