უახლესი ამბები
არქივი
მსოფლიო
ჩერნობილის ატომური ელექტროსადგურის მიმდებარე ტერიტორიაზე ხანძრის გავრცელების ფართობი 5 ჰექტარამდე შემცირდა
უკრაინაში, ჩერნობილის ატომური ელექტროსადგურის მიმდებარე ტერიტორიაზე ტყის საგებსა და მშრალ ბალახს ცეცხლი მოედო, რის გამოც ხანძარი გაჩნდა. კიევის ოლქში უკრაინის საგანგებო სიტუაციათა სახელმწიფო სამსახურის პრესმდივნის, ვიქტორია რუბანის ინფორმაციით, კიევის დროით 8:00 საათის მდგომარეობით დამწვარი ტერიტორიის ფართობი 5 ჰექტარამდე შემცირდა.
„ამ დროისთვის ხანძრის ფართობი 5 ჰექატარამდე აღწევს. ხანძრის ლიკვიდირებისთვის დამატებითი ძალები ჩართეს - ესაა ტექნიკის 15 ერთეული კიევის ოლქის სხვადასხვა ქვედანაყოფიდან. ტყე კი არა, ტყის საგები და ბალახი იწვის. ზემო ხანძარი არაა ამ მომენტისთვის, იწვის ბალახი“, - განაცხადა რუბანმა.
რაც შეეხება ხანძრის სავარაუდო მიზეზს, რუბანმა განაცხადა, რომ ამას დაადგენენ ხანძრის ლიკვიდირების შემდეგ.
ცნობისთვის, გუშინ კიევის დროით 10:10 საათზე ჩერნობილის აკრძალულ ზონაში მშრალ ბალახზე ხანძარი გაჩნდა. ცეცხლის ჩასაქრობად 100 ტონამდე წყალი დაღვარეს. მაშველები ამტკიცებდნენ, რომ პანიკის საფუძველი არ არსებობს. მათივე თქმით, 00:00 საათის მდგომარეობით კიევში, ჩერნობილსა და ჩერნობილის ატომური ელექტროსადგურის ტერიტორიაზე რადიაციული ფონი ნორმის ფარგლებში იყო.
მიუხედავად ამისა, სოცქსელებში პანიკა ატყდა. ვრცელდებოდა ინფორმაცია, რომ იწვოდა წითური ტყე, რომელზეც 1986 წელს ჩერნობილის ატომურ ელექტროსადგურის რეაქტორის აფეთქების შემდეგ რადიოაქტიური მტვერი ყველაზე მეტად გავრცელდა. თუმცა შემდგომ რადიოეკოლოგმა სერგეი გაშჩაკმა ВВС-სთან განაცხადა, რომ წითური ტყე აღარ არსებობს, რადგან მისი დიდი ნაწილი ბულდოზერებით „დაკრძალეს“, ხოლო ნაწილი 2 წლის წინ „დაიწვა“.
ჟურნალისტმა ტატიანა ვისოცკაიამ კი დაწერა, რომ ხანძრის გამო რადიაციული ფონი სადგურზე სამჯერ გაიზარდა. ის ირწმუნებოდა, რომ მთავრობა იტყუებოდა.