რეგიონები

ჭუბერში საპანელო ხიდის აწყობა დილიდან დაიწყო

სვანეთში, ჭუბერში თავდაცვის სამინისტროს საპანელო ხიდის აწყობა დილიდან დაიწყო, მიმდინარეობს კონსტრუქციების აგება. პარალელურად სპეციალისტები მდინარის ნაპირს სწავლობენ.

ხიდის კონსტრუქცია თავდაცვის სამინისტრომ გუშინ შეიტანა, ხიდის აწყობას დაახლოებით 3-4 დღე დასჭირდება.

საპანელო ხიდი საჭირო გახდა, რადგან მდინარე ნენსკრამ რამდენიმე ხიდთან ერთად ჭუბერის დამაკავშირებელი ცენტრალური ხიდი წაიღო. იმისთვის, რომ მდინარის მარცხენა ნაპირზე გადაიყვანონ სამშენებლო ტექნიკა, აუცილებელია სწორედ ასეთი ხიდის აგება. ამასთან, მიმდინარეობს ჭუბერის ძველი შემოვლით გზის აღდგენა.

წუხელ მდინარის დონემ რამდენიმე სანტიმეტრით მოიმატა, თუმცა არანაირი პრობლემა არ შეუქმნია. ამ დროისთვის მიმდინარეობს აღდგენითი სამუშაოები. მუშაობენ გზების აღდგენაზე. ასევე მიმდინარეობს მდინარის კალაპოტის გამაგრება ყველაზე საშიშ ადგილებში.

სულ სტიქიის ზონაში 30-ზე მეტი მძიმე სამშენებლო ტექნიკა მუშაობს.

ჭუბერის მოსახლეობას საკვები პროდუქტები და პირველადი მოხმარების ნივთებს ურიგებენ.

ცნობისთვის, 5 ივლისს უხვი ნალექის გამო მთის დიდი ნაწილი ჩამოიშალა, რასაც მოჰყვა მდინარე ნენსკრას ადიდება. დაიტბორა მიმდებარე ტერიტორია. სოფელი ჭუბერი და კიდევ რამდენიმე დასახლება გარესამყაროს იყო მოწყვეტილი. ჩამოწოლილმა მეწყერმა და მოვარდნილმა ღვარცოფმა სოფლებთან დამაკავშირებელი ხიდები და რამდენიმე სახლი წაიღო.