არქივი
პოლიტიკა
ჩვენ ისევ გვეძახიან საბჭოთა კავშირში, მაგრამ არ დავბრუნდებით - „რუსეთი ოკუპანტიას“ წევრები ევრაზიული კავშირის ბიზნესფორუმს გააპროტესტებენ
ევრაზიული კავშირის ბიზნესფორუმი საპროტესტო აქციის ფონზე გაიმართება. მოძრაობა „რუსეთი ოკუპანტიას“ წევრები მეტეხის ჩრდილთან, სადაც ფორუმი უნდა ჩატარდეს, უკვე იკრიბებიან.
აქციის ორგანიზატორების განცხადებით, ისინი ფორუმის შინაარსსა და თბილისში რუსეთის ბიზნესწრეების წარმომადგენელთა ვიზიტს აპროტესტებენ.
მოძრაობის წევრის ანა ჭარხალაშვილის განცხადებით, ევრაზიული კავშირი საბჭოთა კავშირის იდენტურია. მისი თქმით, პრორუსული ძალები ცდილობენ, საქართველო კვლავ „თავის კლანჭებში“ მოაქციონ.
მისივე განცხადებით, დღევანდელი ფორუმი მცირე მეწარმეების მოხიბვლასა და მათზე ზეგავლენის მოხდენას ისახავს მიზნად.
„ჩვენ ისევ გვეძახიან საბჭოთა კავშირში, მაგრამ არ დავბრუნდებით“,- განაცხადა ანა ჭარხალაშვილმა.
აქციის ორგანიზატორები ფორუმის მონაწილეებისგან აფხაზეთისა და სამაჩაბლოს საქართველოს ნაწილად აღიარებას მოითხოვენ.
„მივალთ და ვთხოვთ აღიარონ, რომ აფხაზეთი და სამაჩაბლო არის საქართველოს ნაწილი და არა რუსეთის“,- თქვა ჭარხალაშვილმა.
ევრაზიული კავშირის ბიზნესფორუმის ქართველი მასპინძლების შესახებ ინფორმაცია ამ დრომდე გასაიდუმლოებულია. რატომ ტარდება საქართველოში ღონისძიება, როცა ჩვენი ქვეყანა ევრაზიული ეკონომიკური კავშირის წევრი არ არის, ეს კითხვა ისევ უპასუხოდ რჩება.