საზოგადოება

ჩვენ ვარღვევთ განათლებაზე თანაბარი ხელმისაწვდომობის ფუნდამენტურ პრინციპს - მაია მიმინოშვილი

შეფასებისა და გამოცდების ეროვნული ცენტრის ხელმძღვანელის, მაია მიმინოშვილის განცხადებით, ახალი კვლევის თანახმად, სოფლისა და ქალაქის სკოლის მოსწავლეების შედეგებს შორის დიდი სხვაობაა, რითაც ირღვევა განათლებაზე თანაბარი ხელმისაწვდომობის პრინციპი.

ამის შესახებ მან ჟურნალისტებს კონფერენციის „სახელმწიფო და საერთაშორისო შეფასება: სასკოლო განათლების ძირითადი გამოწვევები“ დაწყების წინ განუცხადა.

„როდესაც სოფლის სკოლის მოსწავლეებსა და ქალაქის სკოლის მოსწავლეების შედეგებს შორის დიდი სხვაობაა, ეს უკვე იმას ნიშნავს, რომ ჩვენ ვარღვევთ თანაბარი ხელმისაწვდომობის ფუნდამენტურ პრინციპს. სამწუხაროდ, ეს არის დაფიქსირებული კვლევის შედეგებში, რომ ქალაქის სკოლის მოსწავლეებს გაცილებით უკეთესი შედეგები აქვთ, ვიდრე სოფლისა და რეგიონების სკოლის მოსწავლეებს. ცალკე რეგიონს ვერაფრით ვერ გამოვყოფ. ერთადერთი გამოვყოფდი იმ რეგიონს, სადაც ეთნიკური უმცირესობები ცხოვრობენ“, - თქვა მიმინოშვილმა.

შეფასებისა და გამოცდების ეროვნული ცენტრის ორგანიზებით კონფერენცია „სახელმწიფო და საერთაშორისო შეფასება: სასკოლო განათლების ძირითადი გამოწვევები“ დღეს დაიწყო. ღონისძიების მთავარი განსახილველი საკითხებია სასკოლო განათლების ძირითადი გამოწვევები და მათი გადაჭრის გზები.

კონფერენცია ორდღიანია.

ანა მებურიშვილი