საზოგადოება

ჩვენს ბევრ კოლეგას ისევე, როგორც საზოგადოების ბევრ წევრს, არასწორი წარმოდგენა აქვს ნარკოპოლიტიკის რეფორმაზე - აკაკი ზოიძე

„ხშირ შემთხვევაში ჩვენს კოლეგებს ეშლებათ ლეგალიზაცია დეკრიმინალიზაციაში“, - ამის შესახებ ჟურნალისტებს ჯანდაცვის საპარლამენტო კომიტეტის თავმჯდომარემ, აკაკი ზოიძემ განუცხადა.

მისი განმარტებით, ნარკოტიკის ეროვნული პლატფორმის მიერ შეთავაზებული ნარკოპოლიტიკის რეფორმის მიხედვით ნარკომოხმარება დასჯადი დარჩება ოღონდ არა საპატიმრო, არამედ ადმინისტარციული ფორმით.

„ჩვენ დიდი იმედი გვაქვს, რომ შევჯერდებით. ჩვენს ბევრ კოლეგას ისევე, როგორც საზოგადოების ბევრ წევრს, არასწორი წარმოდგენა აქვს, თუ რას ეხება ეს ცვლილებები, რომელიც არის შემოთავაზებული. ხშირ შემთხვევაში ჩვენს კოლეგებს ეშლებათ ლეგალიზაცია დეკრიმინალიზაციაში, რადგან სპეციალისტები არ არიან. ნარკოტიკის მოხმარება რჩება დასჯადი, უბრალოდ დასჯის ფორმა იქნება ადმინისტრაციული დადგენილი ოდენობის ფარგლებში და არა საპატიმრო. კანონპროექტი არ გულისმხობს, რომ ამით ხდება მოხმარების წახალისება ან გასაღებაზე ზომების შემცირება. ეს საკანონმდებლო პაკეტი გარკვეული მიმართულებებით გულისხმობს გამკაცრებასაც. მაგალითად, სააფთიაქო ნარკომანია გაუტოლდება ნარკოტიკულ დანაშაულს, რაც ჩემი აზრით, გამოიწვევს მნიშვნელოვან პრევენციულ ეფექტს“, -თქვა ზოიძემ, რომელიც კანონპროექტის ერთ-ერთი ინიციატორია.

კანონპროექტის ინიცირება უკვე მოხდა საკანონმდებლო ორგანოში, ხოლო მისი საპარლამენტო განხილვები მომავალი კვირიდან იგეგმება.

გუშინ უცხოელმა ექსპერტებმა ქართველ კანონმდებლებს ნარკოპოლიტიკის რეფორმის მიმართულებით საკუთარი გამოცდილება გაუზიარეს. შეხვედრა პარლამენტის ჯანმრთელობის დაცვისა და სოციალურ საკითხთა კომიტეტის ორგანიზებით გაიმართა.

ანა მებურიშვილი