საზოგადოება

დაევალოს ეროვნულ ბანკს, მოქალაქეებს შეუჩეროს სასესხო ვალდებულებები - ანზორ ბიწაძე

პანდემიის პირველი ტალღის დროს ხელისუფლებამ საბანკო შეღავათები დააწესა და მერე დაამადლა მოსახლეობას, რომ თურმე მზრუნველი ხელისუფლება გვყავს. რეალურად ეს იყო მისი ვალდებულება და ახლაც ვალდებულია, მოსახლეობას არ წაართვას ფუნდამენტური უფლება პანდემიის დროს შეუჩერდეს საბანკო ვალდებულებები, - ამის შესახებ „ერთიანი საქართველოს“ ერთერთმა ლიდერმა ანზორ ბიწაძემ განაცხადა.

„ერთიანი საქართველოს“ პრესსამსახურის ცნობით, პარტია ხელმოწერების შეგროვების შემდეგ პეტიციით მთავრობას მიმართავს.

ამასთან, ინფორმაციაში აღნიშნულია, რომ „დელისის“ მეტროსთან აქციას პარტიის ერთ-ერთი ლიდერი ანზორ ბიწაძე ესწრებოდა, რომელმაც პეტიციას ხელი მოაწერა.

„ქვეყანაში მძიმე ეპიდემიოლოგიური ვითარების გამო, ხელისუფლება ვალდებულია გამოაცხადოს ფორსმაჟორი და დაევალოს ეროვნულ ბანკს, მოქალქეებს შეუჩეროს საბანკო ვალდებულებები. კერძოდ, შეჩერდეს სესხებზე პროცენტები, გაუქმდეს ჯარიმები და გადავადდეს სესხები“, - განაცხადა ანზორ ბიწაძემ.

მათივე ცნობით, პარტია აგრძელებს ხელმოწერების შეგროვებას ქვეყანაში განვითარებული მძიმე ეპიდემიოლოგიური ვითარების გამო, რომ გამოცხადეს ფორსმაჟორული ვითარება და ეროვნულმა ბანკმა მიიღოს გადაწყვეტილება შეჩერდეს ყველა საბანკო ვალდებულება სესხებზე, შეჩერდეს პროცენტები და გაუქმდეს ჯარიმები.