საზოგადოება

დაიწყება უნივერსიტეტების ფართომასშტაბიანი, არაგეგმიური შემოწმება - მიხეილ ჩხენკელი

განათლებისა და მეცნიერების მინისტრის, მიხეილ ჩხენკელის განცხადებით, უნივერსიტეტების არაგეგმიური შემოწმება იწყება.

როგორც მიხეილ ჩხენკელმა განაცხადა, უნივერსიტეტებს, რომლებიც ავტორიზაციის პირობებს ვერ აკმაყოფილებენ, სტუდენტების მიღება აეკრძალებათ.

„ჩვენი სამინისტროს მთავარი საზრუნავი იქნება უმაღლესი სასწავლებლების ხარისხი. აქედან გამომდინარე, დაიწყება არაგეგმიური შემოწმება უნივერსიტეტების ხარისხთან მიმართებაში, ავტორიზაციის კუთხით. იმ უნივერსიტეტებს, რომლებიც ვერ აკმაყოფილებენ ავტორიზაციის პირობებს, შეუწყდებათ სტუდენტების მიღება.

საქმე იმაში გახლავთ, რომ სახელმწიფომ სიმართლე უნდა უთხრას ყველა ოჯახს, მშობლებს, აბიტურიენტებს, რომ უნივერსიტეტებს, რომლებსაც ავტორიზაცია აქვთ მინიჭებული, ისინი უნდა იყვნენ, მართალაც მაღალი სტანდარტის უნივერსიტეტები, სადაც სტუდენტები მიიღებენ მაღალი ხარისხის განათლებას“, – განაცხადა ჩხენკელმა.

მისივე თქმით, უნივერსიტეტებს, რომლებიც სტანდარტს ვერ აკმაყოფილებენ, მიეცემათ საშუალება გამოასწორონ სიტუაცია.

ნინო ექვთიმიშვილი