პოლიტიკა
დამატებითი დღეების, მოლოდინების შექმნა, წუთების თვლა არ არის სწორი - გიორგი გახარია ტატუნაშვილის ცხედრის გადმოცემაზე
შინაგან საქმეთა მინისტრის, გიორგი გახარიას განცხადებით, ცხინვალის რეგიონში დაღუპული არჩილ ტატუნაშვილის ცხედრის გადმოცემაზე დამატებითი მოლოდინების შექმნა მიზანშეწონილი არაა.
„რა თქმა უნდა, ჩვენ იმედი გვაქვს, რომ ეს ტრაგიკული პრობლემა გადაწყდება გონივრულ ვადებში და ამისთვის მაქსიმუმს გავაკეთებთ. დღეს კონკრეტულ დღესა და დროზე კომენტარს არ გავაკეთებ, რამეთუ ეს არ არის სწორი. უნდა გვესმოდეს, რომ ჩვენ კონკრეტული მოქალაქეების, ადამიანების ტრაგედიებზე ვსაუბრობთ. დამატებითი დღეების, მოლოდინების შექმნა, წუთების თვლა არ არის სწორი. ჩვენ გეუბნებით, რომ ეს ტრაგიკული შემთხვევა უნდა დასრულდეს გონივრულ დროში“, - განაცხადა გახარიამ.
რაც შეეხება საოკუპაციო ძალების მიერ დაკავებულ საქართველოს მოქალაქეებს, ლევან ქუტაშვილსა და იოსებ პავლიაშვილს, მიმდინარეობს მუშაობა მათი უსაფრთხოების უზრუნველსაყოფად და საქართველოს მიერ კონტროლირებად ტერიტორიაზე გადმოსაყვანად.
ანა მებურიშვილი