პოლიტიკა
დარწმუნებული ვარ, რომ საპრეზიდენტო არჩევნებში მოქმედი პრეზიდენტი ვერ გაიმარჯვებს - ეკა ბესელია
პარლამენტის იურიდიულ საკითხთა კომიტეტის თავმჯდომარის ეკა ბესელიას განცხადებით, პრეზიდენტი არასწორ ინფორმაციას ავრცელებს პრეზიდენტის არაპირდაპირი წესით არჩევასთან დაკავშირებით. ამის შესახებ მან პარლამენტში, დღევანდელ ბრიფინგზე განაცხადა.
საპარლამენტო უმრავლესობის წევრის თქმით, მცდარია მარგველაშვილის განცხადებები, რომ პრეზიდენტის უფლებამოსილებების შეკვეცა მასთანაა დაკავშირებული. როგორც ბესელიამ განმარტა, რომ ესაა სისტემური ცვლილება, რომელიც შეესაბამება საპარლამენტო ქვეყნის მოდელს.
ეკა ბესელია დარწმუნებულია, რომ საპრეზიდენტო არჩევნებში გიორგი მარგველაშვილი ვერ გაიმარჯვებს. მან აღნიშნა, რომ პრეზიდენტის პირდაპირი წესით არჩევის დატოვების შემთხვევაში, დიდი ალბათობით, „ქართული ოცნების“ კანდიდატი გაიმარჯვებდა. მიუხედავად ამისა უმრავლესობის წევრმა თქვა, რომ საკონსტიტუციო ცვლილებებით იზოგება გაუთვალისწინებელი ხარჯები საპრეზიდენტო არჩევნებისთვის და პრეზიდენტის ინსტიტუტისთვის განკუთვნილი ხარჯები.
ანა მებურიშვილი