კომენტარი
დაშლა ამ მიტინგისა აშკარად შეიცავდა ძალის არაკანონიერი გამოყენების ნიშნებს - კობა ნარჩემაშვილი
20 ივნისის აქციის სისხლიან დარბევაზე, დროებით საპარლამენტო საგამოძიებო კომისიის შექმნის ინიციატივას, პარლამენტის წევრი, ქუთაისის მაჟორიტარი დეპუტატი, კობა ნარჩემაშვილი იზიარებს. ამ წინადადების პარლამენტში დაყენებას „ნაციონალური მოძრაობა“ რიგგარეშე სხდომაზე გეგმავს.
„ეს ცუდი არ იქნებოდა იმიტომ, რომ ბევრი კითხვა არსებობს და სწორედ ამ ტიპის მოვლენებისთვის არის საგამოძიებო კომისიები. მე ყოველთვის წინააღმდეგი ვარ, რომ კონკრეტული საგამოძიებო საქმეებისთვის შეიქმნას საგამოძიებო კომისიები, მაგრამ როცა არის პოლიტიკური დატვირთვა, უფრო უპრიანია, რა თქმა უნდა, პარლამენტში საგამოძიებო კომისიის შექმნა. მიტინგი იყო თავისი შინაარსით საზოგადოების მხრიდან აბსოლუტურად ლეგიტიმური, შემდეგ პოლიტიკური ძალების მხრიდან გადაიზარდა ძალადობრივში და ეს აშკარაა. ყველა მცდელობა იმის თქმის, რომ ეს არ იყო ძალადობრივი, უბრალოდ, ფაქტების დამახინჯება გამოვა. ხოლო მეორე ნაწილი, დაახლოებით ღამის 2-ის ნახევრის, 2 საათის შემდეგ, დაშლა ამ მიტინგისა აშკარად შეიცავდა ძალის არაკანონიერი გამოყენების ნიშნებს,“ - განაცხადა ნარჩემაშვილმა.