პოლიტიკა
დავით დონდუაზე ზეწოლა ხორციელდება, რათა ის დათანხმდეს რუსეთის წინადადებას - ნინო კალანდაძე
„ერთიანი ნაციონალური მოძრაობის“ წევრის, ნინო კალანდაძის ინფორმაციით, მიმდინარე ჟენევის მოლაპარაკებებში საქართველო შესაძლო, დათანხმდეს რუსეთის მიერ შეთავაზებულ ძალის არგამოყენების შესახებ შეთანხმების ვერსიას, სადაც რუსეთი არ იქნება წარმოდგენილი კონფლიქტის მხარედ.
როგორც კალანდაძემ „რუსთავი 2“-ს უამბო, ქართული დელეგაციის ხელმძღვანელზე, საგარეო საქმეთა მინისტრის მოადგილეზე დავით დონდუაზე ზეწოლა ხორციელდება, რათა ის ამ შეთანხმებაზე წავიდეს, რის სანაცვლოდ მას საბერძნეთში ელჩად დანიშნავენ.
„იმდენად ბუნდოვანი იყო განცხადებები, რომ ამ დოკუმენტის მიღმა იმალება ქართული მხარის ის ნაბიჯი, რომელიც იქნება ქართული საზოგადოებისთვის მიუღებელი და ჩვენს სახელმწიფო ინტერესებს სერიოზულ დარტყმას მიაყენებს. საკმაოდ უსიამოვნო ინფორმაციაც ვრცელდება იმის თაობაზე, რომ საქართველოს ოფიციალურ წარმომადგენელზე, ბატონ დავით დონდუაზე არის გაძლიერებული ზეწოლა, მათ შორის, ქართული მხარის მხრიდან, რომ დათანხმდეს რუსულ წინადადებას და სანაცვლოდ, მან ჯილდოს სახით მოიპოვოს ელჩის სტატუსი, როგორც ვიცით, საბერძნეთში. ისტორიული პასუხისმგებლობა ექნება ყველას, ვინც უშუალო მონაწილეობას მიიღებს ამაში, ვინც უშუალოდ გააფორმებს ამ შეთანხმებას, რომელიც ნამდვილად არის ანტისახელმწიფოებრივი საქმიანობა“, -თქვა კალანდაძემ.
ჟენევის მოლაპარაკებების მეორე დღეს მონაწილე მხარეები ძალის არგამოყენების შესახებ ერთიანი განცხადების ტექსტზე მსჯელობას გააგრძელებენ. საგარეო საქმეთა მინისტრის მოადგილე, დავით დონდუა ვერ ასახელებს, კონკრეტულად როდის შეთანხმდებიან მხარეები ამ განცხადების მიღებაზე. ქართული დელეგაციის ხელმძღვანელის თქმით, მნიშვნელოვანია, რომ დოკუმენტი ქართული მხარისთვის ხელსაყრელი იყოს.