საზოგადოება

დღეს კოხტას მთაზე ხანძრის ჩაქრობის პროცესში ავიაცია მონაწილეობას აღარ მიიღებს

საგანგებო სიტუაციების მართვის სააგენტოს დირექტორის, ნიკოლოზ სირაძის ინფორმაციით, დღეს სოფელ ართანაში, კოხტას მთაზე ავიაცია ვერ იმუშავებს.

„დღეს ვერტმფრენები ვერ შეძლებენ ჰაერიდან დახმარებას, რადგან მათ უნდა ჩაუტარდეთ რეგლამენტით გათვალისწიენებული შემოწმება, რათა გარკვეული ექსცესები თავიდან იყოს აცილებული. მიუხედავად ამისა ჩვენ საკმარისი ძალა გვაქვს მობილიზებული, რომ ადგილზე მოხდეს კერების დამუშავება“, -უთხრა სირაძემ ჟურნალისტებს.

სირაძის ინფორმაციით, ადგილზე 500-ზე მეტი ადამიანი მუშაობს, ხოლო ცეცხლის გავრცელების საშიშროება არ არსებობს.

კოხტას მთაზე ხანძარს უკვე მეშვიდე დღეა, ებრძვიან. გუშინ ძლიერი ქარის გამო ცეცხლის თითქმის ჩამქრალი კერები ხელახლა გაღვივდა, თუმცა ხანძრის ფართობი არ გაზრდილა.

ანა მებურიშვილი