პოლიტიკა
დღეს პარლამენტში 2019 წლის ბიუჯეტის პროექტის განხილვა განახლდება
დღეს პარლამენტში 2019 წლის ბიუჯეტის პროექტზე მსჯელობა გაგრძელდება. იგეგმება უმრავლესობისა და უმცირესობების წევრების, ასევე კომიტეტებისა და ფრაქციების თავმჯდომარეების გამოსვლები.
მთავარი საფინანასო-საბიუჯეტო დოკუმენტის პირველი მოსმენით განხილვა სესიაზე გუშინ დაიწყო, თუმცა სხდომის ოთხსაათიანი დაგვიანებით დაწყების გამო დეპუტატებმა მსჯელობა დროულად ვერ დაასრულეს.
წინასწარ ცნობილია, რომ ოპოზიცია ბიუჯეტის პროექტს მხარს არ დაუჭერს. ოპოზიციონერი დეპუტატების აზრით, ბიუჯეტში თანხა არამიზნობრივად არის გადანაწილებული.
„საბიუჯეტო შემოსავლების მნიშვნელოვანი წყარო კვლავ ხდება საგარეო და საშინაო ვალები. არ იწვევს ეს ბიუჯეტი ნდობას“, – განაცხადა პარლამენტში ფრაქცია „ნაციონალური მოძრაობის“ თავმჯდომარე რომან გოცირიძემ.
გუშინ ბიუჯეტის პროექტის შინაარსსა და მის პრიორიტეტებს პარლამენტარებს ფინანსთა მინისტრი ივანე მაჭავარიანი აცნობდა.
მომავალი წლის ბიუჯეტში გათვალისწინებულია პენსიის 20 ლარით მატება ასაკობრივი და შეზღუდული შესაძლებლობის მქონე პირების მეორე კატეგორიისთვის, ასევე განსაზღვრულია 50-ლარიანი დახმარება სოციალურად დაუცველი ბავშვებისთვის.
„2019 წლის სახელმწიფო ბიუჯეტის ასიგნებები არის 12 მილიარდ 997 მილიონი. ეს იმას ნიშნავს, რომ მომავალ წელს სახელმწიფო დახარჯავს 538 მილიონით მეტს, ვიდრე ხარჯავს 2018 წელს. მსგავსი ციფრები დამოუკიდებელი საქართველოს ისტორიაში არ ყოფილა. განათლებაზე, სოციალურ სფეროზე, ჯანდაცვასა და ა.შ. ამ სფეროებზე იხარჯება თითქმის ხუთი მთელი ხუთი მეათედი მილიარდი. ჩემი კუთხით ასევე შემიძლია დავამატო, ეს ბიუჯეტი არის მაკროეკონომიკურად გამართული ბიუჯეტი“, – განაცხადა პარლამენტში საფინანსო-საბიუჯეტო კომიტეტის თავმჯდომარე ირაკლი კოვზანაძემ.