საზოგადოება

დღეს თსუ-ის პირველი კორპუსიდან პარლამენტამდე შრომის უსაფრთხოების დაცვის მოთხოვნით მსვლელობა გაიმართება

დღეს 19 საათზე, თბილისის სახელმწიფო უნივერსიტეტის პირველ კორპუსთან შრომის უსაფრთხოების დაცვის მოთხოვნით აქცია „1209“ ჩატარდება. შეკრების ფარგლებში მსვლელობა გაიმართება, რომელიც პარლამენტის შენობამდე გაგრძელდება.

აქციის ორგანიზატორია სტუდენტური მოძრაობა „აუდიტორია115“. როგორც შეკრების ფეისბუკგვერდზეა განმარტებული, 2011-2017 წლების პერიოდში სამუშაო ადგილზე 1209 მუშა დაიღუპა და დაშავდა.

„2011 წლიდან 2017 წლამდე 1209 მშრომელი დაიღუპა და დასახიჩრდა სახელმწიფოს ეკონომიკური პოლიტიკისა და შრომის უსაფრთხოების არარსებობის გამო. ეს არის ომი ხალხსა და ბიზნესელიტის ინტერესებზე მორგებულ სახელმწიფოს შორის.

მაშინ, როცა გვარწმუნებენ არჩევანის თავისუფლებაში, მოქალაქეებს არჩევანის გაკეთება შიმშილსა და უმძიმეს პირობებში შრომას შორის უწევთ. ეს არ არის არჩევანი! ეს არ არის თავისუფლება!

სახელმწიფო თავისი უმოქმედობით გვაიძულებს, ვაშენოთ ისეთი მკვლელი სახლები, რომელიც მსხვერპლად მშენებლების სიცოცხლეს ითხოვს!

მოთმენას აღარ ვაპირებთ, არ შევეგუებით ადამიანების ყოველდღიურ მკვლელობას!

სიჩუმე მკვლელობაში თანამონაწილეობაა.

14 თებერვალი, 19:00 საათი მსვლელობა თსუ-ის პირველი კორპუსის ეზოდან პარლამენტისკენ!

წინააღმდეგობის დროა!“, - წერია განცხადებაში.

აქციის გამართვის მიზეზად დასახელებულია 9 თებერვალს მომხდარი უბედური შემთხვევა. თბილისის მშენებარე კორპუსის მეხუთე სართულიდან 26 წლის მუშა გადმოვარდა.

ანა მებურიშვილი