საზოგადოება

ჯანდაცვის მინისტრი მოსახლეობას C ჰეპატიტის ელიმინაციის პროგრამით სარგებლობისკენ მოუწოდებს

მოგმართავთ ყველას, გამოიყენეთ C ჰეპატიტის ელიმინაციის პროგრამით სარგებლობის უნიკალური შესაძლებლობა, რადგან ის უსასრულოდ არ გაგრძელდება, – განაცხადა ჯანდაცვის მინისტრმა, დავით სერგეენკომ პირველი არხის გადაცემაში „აქტუალური თემა მაკა ცინცაძესთან ერთად“ სტუმრობისას.

სერგეენკოს თქმით, შესაძლოა მერე დაავადებასთან ადამიანები ერთი-ერთზე დარჩნენ და გადასახდელი გაუხდეთ თანხა, რომელიც ჯერ კიდევ ძალიან მაღალია.

წამყვანის შეკითხვაზე, იგეგმება თუ არა ამ მიმართულებით ცვლილებები, დავით სერგეენკომ აღნიშნა, რომ კონტრაქტი, რომელიც ორი წლის წინ გაფორმდა, 10–წლიან თანამშრომლობას ითვალისწინებს და ათი წელი უსასრულო დრო არ არის.

„ჩვენ გვქონდა რაღაც ჩამოყალიბებული ტრადიცია შიდსთან მიმართებით, როდესაც ეს უკიდურესად დახურული საზოგადოება იყო და, სამწუხაროდ, ნაწილობრივ, ასეც რჩება. იგივე იყო C ჰეპატიტის შემთხვევაშიც, მაგრამ ჩვენ გარღვევა მოვახერხეთ და ახლა ბევრი მხარდამჭერი გვყავს. სტიგმის გარღვევა არანაკლები მნიშვნელობის იყო, ვიდრე საკუთრივ მედიკამენტზე ხელმისაწვდომობა“, – განაცხადა დავით სერგეენკომ.

მინისტრმა ასევე აღნიშნა, რომ სახელმწიფო სისხლში ტყვიის შემცველობის ანალიზის მასშტაბური კვლევის დაფინანსებას გეგმავს: „ეს კვლევა წელსვე დაიწყება და მასში მონაწილეობას მიიღებს ჯანდაცვის სამინისტრო, დაავადებათა კონტროლის ცენტრი და გაერო–ს ბავშვთა დაცვის ფონდი.“

ცირა გურგენიძე