სამართალი

დოდო გუგეშაშვილი მკველეობის საქმეში საინტერესო დეტალების გამოკვეთაზე საუბრობს

როდესაც საქმეს ვეცნობოდით, რამდენიმე საინტერესო დეტალი გამოიკვეთა, ამასთან დაკავშირებით მინდა შინაგან საქმეთა მინისტრი ჩავაყენო საქმის კურსში, - ამის შესახებ თადარიგის პოლკოვნიკმა დოდო გუგეშაშვილმა “პალიტრანიუსის“ გადაცემაში „360 გრადუსში“ განაცხადა. მისივე თქმით, არანაირი საფუძველი არ აქვს, რომ გამოძიებას არ ენდოს.

თადარიგის პოლკოვნიკის დოდო გუგეშაშვილის განცხადებით, როდესაც ის ადვოკატთან ერთად მასზე და თავის შვილზე თავდასხმის საქმეს ეცნობოდა, რამდენიმე საინტერესო დეტალი გამოიკვეთა, რასთან დაკავშირებითაც შინაგან საქმეთა მინისტრთან შეხვედრა სურს.

მისი თქმით, შინაგან საქმეთა მინისტრთან შეხვედრის საშუალება, სამწუხაროდ, აქამდე არ ჰქონიათ, თუმცა მის მიმართ მაღალი ნდობის ფაქტორი გააჩნია და გამოძიების უფრო სწრაფად წარმართვის იმედი აქვს.

„საკმაოდ დიდი დრო გავიდა, თუმცა, შეიძლება არც ისე დიდი დრო იყოს გამოძიებისთვის და ასეთი საზარელი მკვლელობისთვის, რომელიც ცხელ კვალზე ვერ გაიხსნა ობიექტური მიზეზების გამო. ჩემს ადვოკატთან ერთად გავეცანი მასალებს. გამოძიება, შეიძლება ითქვას, სრულად მობილიზებულია, ძალიან ბევრი მიმართულებით მუშაობს. როდესაც საქმეს ვეცნობოდით, ჩემთვის და ჩემი ადვოკატისთვის რამდენიმე საინტერესო დეტალი გამოიკვეთა. ვერ ვიტყოდი, რომ ხელჩასაჭიდი, მაგრამ არის ჩვენთვის საინტერესო გარკვეული დეტალები. ამასთან დაკავშირებით მინდა შინაგან საქმეთა მინისტრი ჩავაყენო საქმის კურსში. არა იმიტომ, რომ გამოძიებას არ ვენდობი“,- ამბობს დოდო გუგეშაშვილი.

გუგეშაშვილი ამ დღეებში შსს-თვის ოფიციალური განცხადებით მიმართვას აპირებს.

„მე ვფიქრობ, უფრო მალე და უფრო სწრაფად წავა გამოძიება. არანაირი საფუძველი არ არსებობს იმის, რომ გამოძიებას არ ვენდოთ, მაგრამ ამ შემთხვევაში დროს ჩემთვის ძალიან დიდი მნიშვნელობა აქვს, რომელიც მეჩვენება, რომ უკვე საკმაოდ გავიდა, თუმცა, ისევ ვიმეორებ, რომ გამოძიებისთვის არაა ეს დრო საკმარისი, რომ რეალური შედეგი დაიდოს”, - განაცხადა დოდო გუგეშაშვილმა.

აფხაზეთის ომის ვეტერანს, შეიარაღებული ძალების თადარიგის პოლკოვნიკ დოდო გუგეშაშვილსა და მის შვილს გრიგოლ გუგეშაშვილს ცეცხლსასროლი იარაღიდან დიღმის მასივში, მათსავე საცხოვრებელ ბინაში 7 თებერვალს ესროლეს. გრიგოლ გუგეშაშვილი ადგილზე გარდაიცვალა, დოდო გუგეშაშვილი კი მძიმე მდgომარეობაში ღუდუშაურის სახელობის კლინიკაში გადაიყვანეს.

შსს-მ გამოძიება განზრახ მკვლელობის და დამამძიმებელ გარემოებაში ჩადენილი განზრახ მკვლელობის მცდელობის ფაქტზე სისხლის სამართლის კოდექსის 108-ე და 19-109-ე მუხლებით დაიწყო.

ცირა გურგენიძე