პოლიტიკა

ძალის არგამოყენების შესახებ ერთობლივი განცხადება გაკეთდება იმ შემთხვევაში, თუ ის საქართველოსთვის ხელსაყრელი იქნება - დავით დონდუა

ჟენევის მოლაპარაკებების მეორე დღეს მონაწილე მხარეები ძალის არგამოყენების შესახებ ერთიანი განცხადების ტექსტზე მსჯელობას გააგრძელებენ.

საგარეო საქმეთა მინისტრის მოადგილე, დავით დონდუა ვერ ასახელებს, კონკრეტულად როდის შეთანხმდებიან მხარეები ამ განცხადების მიღებაზე. ქართული დელეგაციის ხელმძღვანელის თქმით, მნიშვნელოვანია, რომ დოკუმენტი ქართული მხარისთვის ხელსაყრელი იყოს.

„ერთობლივი განცხადება გაკეთდება იმ შემთხვევაში, თუ ტექსტი და სხვა გარემოებები იქნება ჩვენთვის ხელსაყრელი. როდის მოხდება მისი შეთანხმება და შემდეგ უკვე გაჟღერება, თუ არ მოხდება, ამაზე წინასწარ ვერ გეტყვით. არაფერი საგანგაშო არ არის, არაფერ ისეთი არ მოხდება, რაც იქნება დამაზიანებელი საქართველოსთვის“, - თქვა დონდუამ.

გუშინდელი დღის მსგავსად განხილვის კიდევ ერთი მთავარი თემა ამჯერადაც იქნება არჩილ ტატუნაშვილის საკითხი. თბილისი ითხოვს მომხდარზე პოლიტიკური პასუხისმგებლობა მოსკოვმა აიღოს.

ჟენევის საერთაშორისო დისკუსიების 43-ე რაუნდი გუშინ დაიწყო.