საზოგადოება

ერმიტაჟში შოთა რუსთაველის 850 წლის იუბილისადმი მიძღვნილი ფესტივალი ჩატარდება

13 ნოემბერს, ქალაქ პეტერბურგში ერმიტაჟის თეატრში შოთა რუსთაველის 850 წლის იუბილეს აღსანიშნავი საგანგებო ფესტივალი - ,,რუსთაველის ეპოქა ერმიტაჟში“ ჩატარდება.

,,ერმიტაჟის“ ორგანიზებით გამართულ საღამოზე მისასალმებელი სიტყვით გამოვა სახელმწიფო ერმიტაჟის გენერალური დირექტორი მ. ბ. პიოტროვსკი, რომელიც შეკრებილ საზოგადოებას მიმართავს.
ასევე, ტელეჩართვა განხორციელდება თბილისიდან - კორნელი კეკელიძის სახელობის ხელნაწერთა ეროვნული ცენტრიდან, სადაც წამყვანი სპეციალისტები ისაუბრებენ და წარმოადგენენ ცენტრში დაცულ უძველეს ხელნაწერებს.

დამსწრე საზოგადოებას საშუალება მიეცემა მოისმინოს ლექციები თემებზე: ,,რუსთაველის ეპოქის ძეგლები", რომელსაც იაროს ლავაბილინკინა წარუძღვება და ,,შოთა რუსთაველი ქართველი ხალხის ცხოვრებასა და ტრადიციაში", რომლის წარმდგენიც ,,სამოსელი პირველის“ დამფუძნებელი ლუარსაბ ტოგონიძე იქნება.

ღონისძიება მგალობელ-მომღერალთა გუნდ ,,დიდგორის” კონცერტით დასრულდება, რომელზეც შესრულდება ხალხური სიმღერები, სპეციალური პროგრამა - ,,მე რუსთველი“ და პოემა ,,ვეფხისტყაოსანთან“ დაკავშირებული სიმღერები.

მარი ნამგალაძე