პოლიტიკა

ეს არის ძალიან ძლიერი ინსტრუმენტი - დიმიტრი ცქიტიშვილი ევროპარლამენტის მიერ მიღებულ საქართველოს მხარდამჭერ რეზოლუციაზე

საპარლამენტო უმრავლესობის წევრი, დიმიტრი ცქიტიშვილი გამოეხმაურა ევროპარლამენტის მიერ დამტკიცებულ საქართველოს მხარდამჭერ რეზოლუციას.

დეპუტატის შეფასებით, ეს დოკუმენტი ანგარიშგასაწევია ყველა მხარისთვის.

„მე დავარქვი რეზოლუციას ევროპარლამენტის კონსოლიდირებული მხარდაჭერა საქართველოს, საქართველოს სამართლიანი ბრძოლის მიმართ და რუსეთის კონსოლიდირებული კრიტიკა.

ეს არის ძალიან ძლიერი ინსტრუმენტი. ევროკავშირი ერთ-ერთი ყველაზე ძლიერი გაერთიანებაა და ჩვენ ამ ინსტრუმენტს გამოვიყენებთ ყველა საერთაშორისო ფორმატში და დონეზე.

ეს არის ძალიან ძლიერი გზავნილი და ძალიან ძლიერი განაცხადი. აღნიშნული რეზოლუცია და ევროპარლამენტის პოზიცია ანგარიშგასაწევი გზავნილია ყველა სუბიექტისთვის“, – განაცხადა ცქიტიშვილმა.

ევროპარლამენტმა საქართველოს შესახებ რეზოლუცია – „საქართველოს ოკუპირებული ტერიტორიები რუსეთის ინტერვენციიდან 10 წლის შემდეგ“ მიიღო.