პოლიტიკა

ესეცაა საზღვრის დაცვის პოლიციის რეფორმირების საჭიროების ერთ-ერთი დამადასტურებელი ფაქტორი - გიორგი გახარია ისნის სპეცოპერაციაზე

შინაგან საქმეთა მინისტრის, გიორგი გახარიას განცხადებით, ისანში ჩატარებულმა სპეცოპერაციამ, რომლის შედეგად აჰმედ ჩატაევი იყო ლიკვიდირებული, საზღვრის დაცვის პოლიციის რეფორმირების საჭიროება დააყენა.

„არის დაწყებული კონკრეტული გამოძიება. ჩვენთვის ყველაზე მნიშვნელოვანია იმის დადგენა, თუ როგორ მოხვდა ეს ხალხი აქ. საზღვრის დაცვის პოლიციის რეფორმირების საჭიროების ერთ-ერთი დამადასტურებელი ფაქტორია ესეც“, -აღნიშნა გახარიამ დარგობრივი კომიტეტების გაერთიანებულ სხდომაზე.

გახარიამ ასევე განმარტა, რომ სპეცოპერაცია გაიწელა მოქალაქეების უსაფრთხოების უზრუნველსაყოფად.

„რეალურად, ამ სპეცოპერაციის დროს ძირითადი ამოსავალი წერტილი იყო მოქალაქეების უსაფართხოება. ამიტომ გაგრძელდა სპეცოპერაცია ამდენი ხნის განმავლობაში. ეს, რა თქმა უნდა, იყო ტრაგედია. თქვენ რომ შეადაროთ მსგავსი ოპერაციები ევროპის განვითარებულ ქვეყნებში ჩატარებულ სპეცოპერაციებს, საკმაოდ კარგად იყო ეს ყველაფერი გაკეთებული“, -თქვა უწყების ხელმძღვანელმა.

ანა მებურიშვილი