პოლიტიკა
ევროკავშირის ელჩი საქართველოში ვიზალიბერალიზაციის ამოქმედების ზუსტ თარიღს ვერ ასახელებს
ევროკავშირის ელჩი საქართველოში იანოშ ჰერმანი ევროკავშირთან უვიზო მიმოსვლის ამოქმედების ზუსტ თარიღს ვერ ასახელებს.
ჰერმანის განცხადებით, საქართველომ ყველა პირობა შეასრულა და ვიზალიბერალიზაცია საქართველო-ევროკავშირის ურთიერთობებზე დადებითად აისახება.
„ზუსტ დროს ვერ დაგისახელებთ, როდის ამოქმედდება უვიზო მიმოსვლა, თუმცა ეს თარიღი შორს არ არის. საქართველომ ბევრი იშრომა და ყველა კრიტერიუმი დააკმაყოფილა. თითოეული ხანგრძლივი მოგზაურობა პატარა ნაბიჯებით იწყება. მას შემდეგ, რაც თარიღი ცნობილი გახდება, ეს ფაქტი საქართველოსა და ევროკავშირის ურთიერთობისთვის ძალიან პოზიტიური შედეგის მომტანი იქნება“, - განაცხადა ჰერმანმა.
შეგახსენებთ, რომ 2 თებერვალს ევროპარლამენტმა მხარი დაუჭირა საქართველოსთვის ვიზალიბერალიზაციის მინიჭებას, რომლის თანახმად, საქართველოს მოქალაქეებს საშუალება ექნებათ უვიზოდ იმოგზაურონ შენგენის ქვეყნებში 90 დღის განმავლობაში.
ანა მებურიშვილი