არქივი
საზოგადოება
ევროკავშირში უვიზო მიმოსვლის პროცედურების სავარაუდო დამრღვევთა შორის თბილისისა და იმერეთის მცხოვრებლები ლიდერობენ
საქართველოდან სავარაუდოდ ყველაზე ხშირად ევროკავშირში უვიზოდ მიმოსვლის პროცედურებს არღვევენ თბილისისა და იმერეთის რეგიონის მაცხოვრებლები. აღნიშნული მონაცემები სამოქალაქო განვითარების სააგენტოს (სიდა-ის) აღმასრულებელმა დირექტორმა ზვიად დევდარიანმა ჟურნალისტებს გააცნო.
„ყოველთვიური ანალიზი არ არსებობს, თუმცა მაგალითად, მოლდოვაში იმ ადამიანების რაოდენობა, ვინც დატოვა ქვეყანა და უკან არ დაბრუნდა, იყო 16%. ჩვენთან არის 6%, ანუ შედარება გვაძლევს საფუძველს ითქვას, რომ მონაცემები არ არის საგანგაშო, თუმცა მეორე მხრივ, დამრღვევთა სავარაუდო რაოდენობა ყველა უწყებას უბიძგებს მოქმედებისკენ. გამოიკვეთა, რომ თბილისი, ასევე იმერეთის ქალაქებია ის ქალაქები, სადაც ყველაზე მაღალია პროცენტი ადამიანების, რომლებმაც, სავარაუდოდ, დაარღვიეს უვიზოდ მიმოსვლის პროცედურები“, -თქვა დევდარიანმა ნატოსა და ევროკავშირის შესახებ საინფორმაციო ცენტრში, სადაც შეაჯამეს ევროკავშირთან უვიზო მიმოსვლის შვიდი თვის შედეგები.
დევდარიანმა საინფორმაციო კამპანიების დაწყების შესაძლებლობაზე ისაუბრა, რომელთა მეშვეობით საზოგადოება მეტად ინფორმირებული იქნება, რა პრობლემებს გამოიწვევს უვიზო მიმოსვლის წესების დარღვევა საქართველოსთვის.
„შეხვედრაზე აღინიშნა, რომ დამრღვევთა რიცხვი საგანგაშო არ არის, თუმცა იძლევა საფუძველს, რომ საინფორმაციო კამპანიები ვაწარმოოთ მათ შორის იმ რეგიონებში, საიდანაც ყველაზე მეტი ადამიანი წავიდა და უკან აღარ დაბრუნდა. მოსახლეობამ უნდა იცოდეს, რომ, სამწუხაროდ, შესაძლოა, უვიზო მიმოსვლა შეჩერდეს“, - განაცხადა დევდარიანმა.
საქართველოს მოქალაქეების ევროკავშირში უვიზო მიმოსვლის უფლებით 28 მარტიდან სარგებლობენ.
ანა მებურიშვილი