პოლიტიკა

ევროპარლამენტი საქართველოსთან ურთიერთობების გაღრმავების ახალი ინიციატივით გამოდის

ევროპარლამენტი საქართველოსთან, უკრაინასთან და მოლდოვასთან ევროკავშირის ურთიერთობების გაღრმავების ახალი ინიციატივით გამოდის.

ამის შესახებ ევროპარლამენტის მიერ გამოქვეყნებულ ანგარიშშია ნათქვამია.

ანგარიშის თანახმად, აღმოსავლეთ პარტნიორობის ქვეყნებთან არსებული თანამშრომლობის შემდგომი გაღრმავება უნდა მოხდეს და ახალი გზები გამოიძებნოს, რათა მხარდაჭერა გაუწიონ ქვეყნებს ევროკავშირის აღმოსავლეთ საზღვრებზე.

აღნიშნულ ანგარიშში ძირითადი აქცენტი საქართველოზე, უკრაინაზე და მოლდოვაზე კეთდება, ქვეყნებზე, რომლებმაც დიდ პროგრესს მიაღწიეს ევროკავშირთან თანამშრომლობაში.

რეკომენდაციების სიაში მოცემულია საქართველოსთვის, უკრაინისათვის და მოლდოვასთვის მიზნობრივი ფონდის შექმნა, რომელიც წარმოადგენს განვითარების ინსტრუმენტს, რათა ევროკავშირმა სწრაფად და მოქნილად გასცეს პასუხი კრიზისულ და პოსტკრიზისულ სიტუაციებს.

ფონდის ფარგლებში მოზიდული იქნება საჯარო და კერძო დონორების რესურსები, რათა ინვესტირება მოხდეს სოციალური და ეკონომიკური გაუმჯობესების პროექტებში.

ევროპარლამენტის საგარეო საქმეთა კომიტეტი ასევე გამოდის რეკომენდაციით, გაიზარდოს ეკონომიკური რეფორმების მხარდაჭერა და არსებული პარტნიორობის გაუმჯობესება.

ანგარიში უკვე მიიღო ევროპარლამენტის საგარეო საქმეთა კომიტეტმა და მას კენჭი ეყრება ევროპარლამენტის პლენარულ სესიაზე, რომელიც სტრასბურგში ნოემბერში გაიმართება.