საზოგადოება

,,ევროპული საქართველო“ ფაროსანასთან საბრძოლველად საგანგებო მდგომარეობის გამოცხადებას ითხოვს

ეს არის პრობლემა, რომელსაც დასავლეთ საქართველოს გლეხობა, სამწუხაროდ, ელოდება ისე, როგორც შეიძლება რაღაც ეპიდემიას და შავ ჭირს ელოდებოდეს, - განაცხადა „ევროპული საქართველოს“ ხონის მაჟორიტარობის კანდიდატმა, გიგი უგულავამ აზიური ფაროსანას გავრცელებასთან დაკავშირებით.

გიგი უგულავა აღნიშნავს, რომ ფაროსანა საქართველოში უკვე ორი წელია რაც არის და მთავრობას ამ დრომდე მასთან საბრძოლველად რეალური ნაბიჯები არ გადაუდგამს.

„საქართველოს მთავრობის გეგმა, აბსოლუტურად, მოწყვეტილია რეალობას. საქართველოს მთავრობის გეგმა არის მხოლოდ ზერელე და მათ არ აქვთ გასიგრძეგანებული იმ პრობლემის მნიშვნელობა, იმ კატასტროფული პრობლემის მნიშვნელობა, რომლის წინაშეც ჩვენი ქვეყანა, განსაკუთრებით, სოფლის მცხოვრებლები არიან,“ - განაცხადა უგულავამ.

მისი თქმით, პრობლემა საკმაოდ მწვავეა და მას სწრაფი მოგვარება სჭირდება.

„გამოსაცხადებელია ტოტალური ბრძოლა, გამოსაცხადებელია საგანგებო მდგომარეობა მთელ იმ რეგიონებში, სადაც ამის ალბათობა დღეს არის მაღალი. საგანგებო მდგომარეობა ზუსტად ისე, როგორც იყო ბორჯომში, ამის გარეშე შეუძლებელი იქნება შეკავება და ჩვენ გაისად და შემდეგ ეს პრობლემა შეიძლება მივიღოთ ქართლში, სადაც ვაშლის მოსავალს ემუქრება დიდი საფრთხე და შემდეგ უკვე კახეთში, ყურძნის მოსავალს,“ - განაცხადა გიგი უგულავა.

ნინო ექვთიმიშვილი