პოლიტიკა
„ევროპული საქართველო“ გიორგი კვირიკაშვილს პარლამენტში იწვევს
„ევროპული საქართველო“ ქვეყნის პრემიერ-მინისტრ გიორგი კვირიკაშვილს პარლამენტში იწვევს უმცირესობასთან შეხვედრის ფორმატში. ამის შესახებ პარტიის წევრმა გიგი წერეთელმა დღევანდელ ბრიფინგზე განაცხადა.
„პრემიერ-მინისტრს ვიწვევთ პარლამენტში იმისათვის, რომ უმცირესობის კითხვებს პასუხი გასცეს, იმიტომ რომ საზოგადოებას ზუსტად მთავრობისგან აინტერესებს, რა გეგმა აქვს მთავრობის ქვეყნის ამ რთული მდგომარეობიდან გამოსაყვანად“, - განაცხადა გიგი წერეთელმა.
პრემიერ-მინისტრის გარდა „ევროპულ საქართველოს“ საკანონმდებლო ორგანოში ფინანსთა მინისტრთან, სოფლის მეურნეობის მინისტრთან და საგარეო საქმეთა მინისტრთან შეხვედრა სურს.
პარტიის ერთ-ერთი ლიდერის, გიგა ბოკერიას განცხადებით, ერთი წელია, არცერთი მინისტრი არ თანხმდება მათს შეთავაზებაზე, რომ საპარლამენტო ოპოზიციას შეხვდეს.
„ერთი წელია, არცერთი მინისტრი არ გამოცხადებულა ჩვენი ფრაქციის მოწვევით პარლამენტში. ერთი წელია, ვერ გამონახეს დრო იმისათვის, რომ პარლამენტში მივიდნენ. ხან ეძახიან, რომ დრო არ აქვთ, ხან საერთოდ პასუხს არ იძლევიან ჩვენს მოთხოვნაზე“, -თქვა ბოკერიამ.
მისი მტკიცებით, ეს აჩვენებს მინისტრთა კაბინეტის უპატივცემულობას პარლამენტის, კანონისა და ხალხის მიმართ.
„ამით ისინი ახდენენ დემონსტრირებას იმ მოდელის, რომლითაც იმართება ქვეყანა, რომ ყველაფერს მართავს ერთი არაფორმალური მმართველი ივანიშვილი და მთავრობაში ყველა არის ანგარიშვალდებული მის წინაშე, რომ მათ ფეხებზე ჰკიდიათ პარლამენტი, კანონი და საბოლოო ჯაშსი ხალხიც“, -აღნიშნა ბოკერიამ.
ანა მებურიშვილი